Sugboanon midominar sa Tough Drifting events | SunStar

Sugboanon midominar sa Tough Drifting events

Time to read
1 minute
Read so far

Sugboanon midominar sa Tough Drifting events

Sunday, June 18, 2017

MAKAPANGANGHA nga pagmaniubra sa manubela ug grupo sa Philippine Basketball Association (PBA) legends ang naghatag og saktong lingaw sa mga tumatan-aw sa Hoops and Wheels niadtong Sabado sa SM City Cebu parking area.

Giorganisar sa Tough Drifting (TD) Events, ang kalihukan gilangkuban sa 1st Drift Visayas-Mindanao Champion­ship ug usa ka basketball exhibition game nga gipangulohan sa mga higante nga sila si Marlou Aquino ug Bonel Balingit nga parehong adunay gitas-ong 6’9”.

Napulo ka drifters gikan sa nagkalainlaing dapit sa nasod ang nagpalabwanay og abilidad sa pagmaniubra sa ilang sakyanan.

Pagkahuman sa kompetisyon, mga Sugbuanon ang nanghawod.

Nahimo nga kampiyon mao si Jong King unya nag­sunod kaniya ang kata­­gilungsod nga si Anthony Dicdican. Niangkon sa ikatulong dapit mao si Eric Suliguin sa Manila.

“Cebuano drifters are very promising. Napakaraming magagaling na drifters dito sa Cebu na hindi lang nabigyan ng opportunity dahil walang venue dito for drifting,” matod ni TD Evehnts vice president for operation Grace Li sa miaging gabii atol sa closing event sa kompetisyon sa Wellcome Hotel sa dalan Molave, dakbayan sa Sugbo.

Ang mga nag-organisar temporaryo lang nga migamit og luna alang sa pagpahigayon sa kompetisyon.

Ang bantugang drifter sa nasod nga si Boodie Dabasol, kinsa lumad nga taga Talisay City, Cebu, mipadayag sab og pagbilib sa iyang mga ka­tagilungsod nga drifters.

“Bilib gyud ko sa Cebuano drifters, they have all the potentials,” matod ni Dabasol, kinsa maoy nagdumala sa teknikal nga aspeto sa kompetisyon.

Sa basketball exhibition game, ang PBA Legends nga gikan sa Sugbo mao ang ningdaog batok sa ilang kaparang gikan sa Luzon.

Gawas kang Balingit, ang ubang mga ningduwa alang sa Cebu squad mao sila si Al Solis, Roger Yap, Rey Evangelista ug Roel Gomez.

Lakip sa mga ningduwa sa habig sa Luzon mao sila si Aquino, Jerry Codiñera, Bal David, Kenneth Duremdes ug Jerome Ejercito.

Gipasabot ni Li nga aduna’y tulo ka legs kining maong kalihukan ug iyang gipasalig nga mobalik kini dinhi sa Sugbo alang sa ika­tulo ug katapusang leg.

“Dito kami nagsimula, dito din kami magtatapos at sisi­guraduhin namin na mas malaki ang ating final leg,” matod niya. /ESL

Gipatik sa mantalaang Superbalita Cebu Hunyo 19, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments