HUMAN gihampak og mga kontrobersIya sa miaging tuig, ang Cebu Schools Athletic Foundation Inc. (Cesafi) miusab sa ilang format sa basketball event ning tuiga.
Imbes sa round-robin semi-finals, ang torneyo mosubay na sa No.1 batok No.4 ug No.2 batok No.3 alang sa top four nga panagsangka diin ang top tow teams adunay twice-to-beat nga bintaha.
“So that there won’t be any controversies. There won’t be any ‘bigayan’. We might as well change the format,” matod ni Cesafi commissioner Felix Tiukinhoy Jr. sa SunStar Cebu, igsuong buhatan ning mantalaan.
Sa college division, ang torneyo mosunod sa double round-robin alang sa elimination round diin ang mopatigbabaw nga upat mao ang makataak sa semis.
Sa miaging tuig, ang Southwestern University (SWU) Cobras miharos pagdaog sa tanan nilang 12 ka mga tahas sa elimination round.
Apan pag-abot sa semi-finals, diin round-robin pa ang gisunod, wala damhang natagak ang Cobras.
Aduna pasangil niadtong higayuna nga tuyong nagpapilde ang University of the Visayas (UV) sa University of San Carlos (USC) Warriors aron dili makasulod ang Cobras sa finals.
Sa pag-usab sa format, naglaom ang Cesafi nga dili na kini mahitabo pagbalik.
Ning tuiga, ang makaharos pagdaog sa tahas sa elimination round makaderetso pagsulod sa finals.
Kon mahitabo kini, ang 3rd ug 4th placers magsangka sa usa ka knockout game aron ilugan ang katungod sa pagpakigbatok sa twice-to-beat No.2 team alang sa inilugay sa nahabiling luna sa finals.
Ang high school division mosubay sa single-round robin alang sa elimination round. Ang mopatigbabaw nga upat mao ang makasaka sa semis.
Ang Cesafi 2017 season mosugod karong Agusto 15. EKA, ESL