DUHA ka Sugbuanon ang nahilakip sa labing angayang atangang mga atleta sa Pilipinas nga mokombati sa Southeast Asian Games nga ipahigayon karong Agusto 19-30 sa Kuala Lumpur, Malaysia.
Gipangtumbok mao sila si marathoner Mary Joy Tabal ug Rubilin “Bingkay” Amit sa billiards.
Si Tabal, kinsa nagrepresentar sa nasod sa miaging Rio Olympics, hugot nga nagbansaybansay sa gawas sa nasod alang sa ilang kampanya sa matag duha ka nga tuig nga kompetisyon.
Ang lumad nga taga brgy. Guba, dakbayan sa Sugbo nakakuha og silver medal sa 2015 nga edisyon sa kompetisyon sa Singapore.
Ning higayuna, gipasalig ni Tabal nga buhaton niya ang tanan aron mabira ang gold medal.
Si Amit, kinsa lumad nga taga dakbayan sa Mandaue, gilaumang makasakmit na sab og gold medal ning higayuna.
Kini maoy ikapitong higayon nga modumbol si Amit sa SEA Games diin nakabulsa na siya og lima ka gold medals.
Si Tabal mopakita og aksyon karong Agusto 19, pipila ka mga oras sa dili pa pormal nga sugdan ang kompetisyon, samtang si Amir mosugod og dumbol karong Agusto 22.
Ang ubang gilauman nga makahatag og gold medal sa Pilipinas basi sa artikulo nga migawas sa www.abs-cbnnews.com mao sila si Luis Gabriel Moreno sa archery ug Fil-Am Eric Clay sa athletics.
Si Moreno maoy labing unang nakahatag og medalya sa Pilipinas sa Summer Youth Olympics niadtong 2014 diin gikauban niya ang usa ka Chinese.
Sugdan ni Moreno ang iyang kampanya karong Agusto 20.
Si Clay nakakuha og gold medal sa 100 meters ug 200 hurdles niadtong 2015 ug gilaumang manghawod siya’g balik ning higayuna. Mosugod siya og duwa karong Agusto 22.
Angayan sab nga atangan sa mga Pinoy sila si Kobe Paras sa men’s basketball, Adril Bernardino sa women’s basketball, Eumir Felix Marcial sa boxing, Jarvey Gayoso sa football, Alyssa Valdez sa volleyball ug Kirstie Alaine Alora sa taekwondo.
Ang Pilipinas adunay 493 ka mga atleta nga mopakita’g aksyon sa SEA Games dala ang tinguha nga malabwan niini ang 6th place finish niadtong 2015.
Sa pangagpas sa Philippine sports officials, 63 ka gold medals ang mabira sa Pilipinas ning higayuna. Niadtong 2015, ang Pilipinas igo lang nakakuha og 29 ka gold medals. (ESL)