NAKALABNI og gold medal si Colin Syquia sa individiual showjumping sa equestrian event sa 29th Southeast Asian Games kagahapon sa Equestrian Center sa Kuala Lumpur, Malaysia.
Ang gold medal ni Syquia maoy ika-23 nga nahipos sa Pilipinas sa matag duha ka mga tuig nga kompetisyon.
Duha ka mga kaatbang gikan sa host Malaysia ang nalupig ni Syquia sa inilugay og bulawan.
Sa laing bahin, naharos sa Pilipinas ang gold medals sa 9-ball billiards event human napatigbabawn ni Carlo Biado ang men’s 9-ball competition niadtong Dominggo sa gabii.
Gilupig ni Biado si Duong Quoc Hoang sa Vietnam, 9-5, sa finals.
Si Biado, kinsa naghari ning maong event sa World Games ning bag-uhay lang, misunod sa kababayang si Chezka Centeno, kinsa maoy mikampiyon sa 9-ball women’s event.
Lab-as pa sa iyang kalampusan sa World Games, si Biado nakaposte dayon og 5-1 nga rekord ug wala na kini milingi og balik.
“Kumpiyansa na ako nung nakuha ko ‘yung break ko. Kada break ko, laging may nahuhulog. Nakakadagdag ng kumpiyansa. Every time na nagbe-break ako, laging open ‘yung bola,” matod sa 33 anyos nga si Biado.
Ang sunod nga kompetisyon nga salmutan ni Biado mao ang Asian Indoor and Martial Arts Games sa Turkmenistan karong Septiyembre. (ESL)