Wade mobiya sa Bulls; posibling makigkauban og balik ni James

MANUGBALHIN na sab og la­­­ing team si Dywane Wade apan ang mikuha og dakong atensyon mao ang posible niyang pagpa­kig-uban og balik kang LeBron James, ning higayuna sa Cleveland Cavaliers.

Sa miaging season sa National Basketball Association (NBA), si Wade miduwa sa Chicago Bulls human sa iyang pagbiya sa Miami Heat.

Apan usa ka kasaligang tinubdan ang mibutyag sa The Associated Press nga nag­kasinabot si Wade ug ang Bulls alang sa usa ka buyout sa iyang kontrata.

Dili ikalimod nga daghang teams ang interesadong mokuha kang Wade apan posibleng panag-uban og balik nila ni James ang mialisngaw og grabe. Ang duha nakakuha og duha ka mga titulo dihang pareho pa silang nagduwa sa Heat.

Lakip sa mga posibleng mabalhinan ni Wade mao ang San Antonio Spurs ug ang Oklahoma City Thunder, nga bag-uhay lang nakabira kang Carmelo Anthony gikan sa New York Knicks.

Kon sa Thunder mahiluna si Wade, hayan iyang ikauban ang sama niyang mga All-Star nga sila si Anthony, Russell Westbrook ug Paul George.

“I’m going to take tonight and some of tomorrow and speak to the teams or players that are on my list and go from there,” pasabot ni Wade.

“My decision is a pure basketball decision and I’ll make the one that fits me best at this point in my career, and with what I feel I have to offer a team that needs what I have to offer.”

Si Wade aduna pa’y dawatunon nga $24 million karon nga season sa iyang kontrata sa Bulls.

Sa miaging season, natabangan ni Wade ang Bulls nga makaabot sa playoff bisan sa ula­hing bahin na kini sa regular sea­son naka­duwa gumikan kay gi­hasol kini sa iyang pagkaangol.

Hamubong panahon nga pag­du­wa niya sa Bulls, si Wade nag-a­verage og 18.3 pun­tos. (AP, ESL)