Jaguars, Webmasters mag-ilog sa ikaduhang luna sa finals | SunStar

Jaguars, Webmasters mag-ilog sa ikaduhang luna sa finals

Time to read
1 minute
Read so far

Jaguars, Webmasters mag-ilog sa ikaduhang luna sa finals

Friday, October 06, 2017

Dakong tahas. Ang headcoach sa USJ-R Jaguars nga si coach Jun Noel (tuo) ug assistant coach si Bong Pineda ang mosagubang og dakong tahas karong hapon sa ilang pagpakigsangka sa University of Cebu Webmasters ni coach Raul “Yayoy” Alcoseba sa do-or-die battle alang sa ikaduhang lingkoranan sa finals. Ang USJ-R nga nakaangkon sa twice-to-beat nga bintaha gilubong sa UC sa una nilang panagsangka. (Jun Migallen)

Duwa karon
4:00 pm- USJR batok UC (srs)

MAGTINAGAKAY ang University of Cebu (UC) Webmasters ug University of San Jose Recoletos (USJR) Jaguars sa nag-inusarang duwa karong hapon sa semi-finals sa Cebu Schools Athletic Foundation Inc. (CESAFI) basketball college division sa Cebu Coliseum.

Ang modaog ning sangkaa mao ang makigharong sa defending champions University of the Visayas (UV) Green Lancers sa best-of-three championship series.

Naangkon sa Green Lan­cers ang unang lingkuranan sa finals human nila gipalagpot ang University of San Carlos (USC) Warriors, 81-71, niadtong Huwebes.

Ang Webmasters ni coach Raul “Yayoy” Alcoseba naka­kita pa og laing pagsidlak sa adlaw human nila gipakuratan ang twice-to-beat nga Jaguars ni coach Jun Noel, 81-70, niadtong Martes.

Adunay twice-to-beat nga bintaha ang Jaguars ning maong panagparang isip ilang benepisyo sa mas taas nilang posisyon nga naangkon pagkahuman sa double-round elimination.

Apan ning puntoha, wala na’y bintaha ang Jaguars ug tatawng mingtapon na sab sa Webmasters ang momentum ning maong panagparang.

Sa tulo ka mga panagharong sa duha ka mga kampo gikan pa sa elimination round, ang Webmasters mao na ang nakapabor, 2-1.

Sa premiro nilang duwa ni­adtong Septiyembre 2, gipangbuntog sa Webmasters ang Jaguars, 87-85.

Sa ikaduhang sangka niadtong Septiyembre 23, ning­bawos ang Jaguars, 87-83.

Sa premiro nilang duwa sa semis, ang Webmasters wala damhang nakadominar sa kombati diin kanunay silang naglabaw og dobleng numero nga puntos gikan sa sinugdanan hangtod sa katapusan.

Ning kombatiha, lima ka mga magduduwa sa Webmasters ang ningmugna og dobleng numero nga puntos pinangulohan ni Garciano Puerto, kinsa nimugna og 20.

Ang import sa Webmasters nga si Frederick Elombi nidugang og 19 puntos, nihatag og 14 si Joren Tagudin, nitapon og 12 si John Calvin Jabello samtang nidugang og 11 si Justine Dacalos.

Gilauman nga adunay dakong adjustments nga himuon ang Jaguars hilabi na sa de­pensa aron mapugngan ang posibleng laing eksplosibong duwa sa Webmasters.

Ang Jaguars magsalig og maayo nila ni Jaybie Mantilla, Julius Pacanuayan, RJ Dinolan, Albert Catiloc, Miguel Gastador ug Ricky Peromingan. (ESL)

Gipatik sa mantalaang Superbalita Cebu Oktubre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments