POSIBLING ma-disqualify ang Fil-German nga si Christian Standhardinger tungod sa wa pagtunga niini sa unang adlaw sa Draft Combine sa PBA kagahapon didto sa Hoops Center.
Kini maoy pangagpas sa ubang mga team officials sa PBA.
Apan ang PBA daling mipasabot nga dugay ra diayng nananghid si Standhardinger nga dili makatunga sa duha ka adlaw nga Draft Combine.
“Matagal ng nagpaalam kay Kom ‘yon,”matod ni Willie Marcial, PBA director for external communications.
Tungod niini magpabilin gihapon sa listahan ang pangalan ni Standhardinger alang sa adlaw na gyud sa Rookie Draft karong Oktubre 29.
Gipasabot sa mga PBA officials nga nananghid ug giaprobahan na ni Commissioner Chito Narvasa ang wa pagtunga sa 6-8 nga Fil-German kinsa gituohan nga maoy mamahimong no. 1 pick.
Sa pagpalta niStandhardinger, si Kiefer Ravena maoy nahimong sentro sa atraksiyon kagahapon.
Sa lima ka drills ang kanhi Ateneo de Manila University standout ang mipatugbabawe sa tulo niini nga maoy magsilbing barometro sa ilang pag-apply sa professinal league. (JBM)