Cavs gitusak sa Rockets | SunStar

Cavs gitusak sa Rockets

Time to read
1 minute
Read so far

Cavs gitusak sa Rockets

Friday, November 10, 2017

Veteran's move. Gilutsan sa beteranong guard sa Houston Rockets James Harden (13) ang laing beterano nga si Dwyane Wade sa Cleveland Cavaliers (9) niining aktoha atol sa ilang duwa kagahapon. Si Harden mipuga og triple-double nga performance pinaagi sa iyang 35 puntos, 11 ka rebounds ug 13 ka assists aron lupigon ang Cavaliers, 117-113. (AP)

NAGPAKATAP og triple-double si James Harden aron agakon ang host Houston Rockets ngadto sa kulbahinam nga kadaugan batok sa Cleveland Cavaliers, 117-113, kagahapon sa National Basketball Association (NBA).

Ang gitawag og “The Beard” bangis nga nimugna og 35 puntos, 11 rebounds ug 13 assists aron pangulohan ang Rockets nga mainat sa upat ang sunodsunod nga kadaugan niini. Naggunit na sila og 9-3 nga rekord.

Nidugang og 20 puntos si Eric Gordon alang sa Rockets, nitampo og 19 puntos si Clint Capela samtang nihatag og 17 puntos si Trevor Ariza.

Ang Cavaliers, nga nahagbong sa 5-7 nga rekord, gipangulohan ni LeBron James pinaagi sa iyang 33 puntos, nitunol og 27 puntos si Jeff Green samtang niamot og 17 puntos si Kevin Love.

Gikan sa 98-111 nga biya, ang Cavaliers ningmugna og 13-1 nga rally aron pahakan ang labaw sa Rockets, 112-111, sa nahabiling 90 ka mga segundos.

Ang alley-opp play ni Capela gikan sa pasa ni Harden mao ang nakapukaw sa nahinanok nga opensa sa Rockets ug ang nakaayo pa niini, nakadaginot pa siya og foul niadtong gutloa.

Nakompleto ni Capela ang iyang three-point play aron inaton sa 115-111 ang labaw sa Rockets sa himatyong mga segundos.

Nakapasulod og lay-up si James sa return play apana gitubag sab dayon kini ni Capela aron ibalik sa upat ka mga puntos ang labaw sa Rockets sa nahabiling 10.7 segundos.

Human niini, wala na nakabangon ang Cavaliers hangtod na sa pagkapupos sa oras.

“We expect him to do that,” asoy ni Rockets coach Mike D’Antoni kabahin sa krusyal nga mga puntos ni Capela. “He’s 23 years old. There’s no reason why he can’t keep getting better.”

Ang Cavaliers napilde og unom sa miagi nilang walo ka mga duwa.

“We played a pretty good game, but I’m not here for moral victories,” tubag ni James sa pangutana kon nganong nagkagidlay ang Cavaliers ning sayong bahin sa season.

“That’s not what I’m about,” dugang niya.

Kini maoy ikatulong higayon sa miaging upat ka mga duwa sa Rockets nga nakamugna si Harden og 30 puntos o pataas nga gibuwakan sa iyang 56-point performance sa ilang kadaugan batok sa Jazz niadtong Lunes.

Ikaduha kining higayon sa season nga nakamugna si Harden og triple-double ug iyang ika-33 sa kinatibuk-an.

“I thought our guys really scrapped and competed,” asoy ni Cleveland coach Tyronn Lue. “But Harden was Harden. He made some tough, contested 3s off the dribble, which we wanted. We contested all of them, but he made some big shots.”

Ning sangkaa, wala moduwa ang usa sa mga sinaligan sa Cavaliers nga si Derrick Rose gumikan kay nagsakit ang wa nga tuhod niini. (AP, ESL)

Gipatik sa mantalaang Superbalita Cebu Nobyembre 11, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments