Kutas nga kadaugan | SunStar

Kutas nga kadaugan

Time to read
1 minute
Read so far

Kutas nga kadaugan

Tuesday, November 14, 2017

Tukmod. Nagtinukmoday sila si Cleveland Cavaliers forwrad LeBron James (wa) ug New York Knicks center Kristaps Porzingis (tuo) ning aktuha aron makailog og mas maayong posisyon. Munasginhawang gibuntog sa Cavaliers ang Knicks ning duwa, 104-101. (AP photo)

NINGBANGON gikan sa 23 nga pagkalubong ang Cleveland Cavaliers aron lupigon ang host New York Knicks, 104-101, kagahapon sa National Basketball Association (NBA).

Gipangulohan ni LeBron James ang kadaugan pinaagi sa iyang 23 puntos ug 12 assists apan ang kontribyuson ni Kyle Korver mao ang nag-agak sa Cavaliers sa panahon nga gikinahanglan.

Si Korver niamot og 21 puntos diin 19 niini iyang gimugna sa 4th quarter sa higayon nga naggukod pa ang Cavaliers.

Natawagan og technical foul si James sa 1st quarter dihang nakigsumpaki siya nila ni Frank Ntilikina ug Enes Kan­ter. Ang maong hitabo daw nakapaulbo sa kadasig sa Knicks sa hinayhinay nga pagposte og 23 puntos nga labaw.

“I knew we had another half,” batbat ni James. “Didn’t know that I was going to get snatched like that early in the third, but I felt if I got back in I could still make some plays to help our team win.”

Ang Cavaliers nagpauwan og siyam ka three-pointers sa 4th quarter, duha niini kang James, aron paphaon ang labaw sa Knicks.

Ningdominar ang Cavaliers sa hinakutay og puntos sa 4th quarter, 43-25.

“Now we just kept talking about chipping away, chipping away,” matod ni Dwyane Wade, kinsa nitampo og 15 puntos alang sa Cavaliers.

“And then as you saw Kyle Korver got going and then when you saw LeBron check back in, you knew, OK. You saw the waves coming.”

Ang Cavaliers ningsaka sa 7-7 nga rekord samtang ang Knicks ningkanaog sa 7-6 nga baraha.

Ang Knicks gipangulohan ni Tim Hardaway Jr. pinaagi sa iyang 28 puntos ug 10 rebounds, nidugang og 20 puntos ug 16 rebounds si Kanter samtang niamot og 20 puntos si Kristaps Porzingis.

Nahitabo ang kasamok sa 1st quarter dihang nakahansak si James unya wala kini molihok ug nagbabag sa agianan dihang misuway pagkuha si Ntilikina sa bola paingon sa baseline.

Gitukmod ni Ntilikina si James unya niadtong higayuna niduol si Kanter kang James ug nakigbinayloay kini’g mahait nga mga pulong sa gikonsiderar nga hari sa NBA.

“I don’t care ... what you call yourself. King, Queen, Princess, whatever you are. You know what, we’re going to fight and nobody out there (is) going to punk us,” matod ni Kanter.

“I’m the King, my wife is the Queen and my daughter is the Princess. So we got all three covered.”

Parehong natawagan og technical fouls sila si James ug Kanter.

Sa laing mga duwa, ningdaog ang Washington Wizards batok sa Sacramento Kings, 110-92, Milwaukee Bucks batok Memphis Grizzlies, 110-103, New Orleans batok Atlanta Hawks, 106-105, LA Lakers batok Phoenix Suns, 100-93, Minnesota Timberwolves batok Utah Jazz, 109-98, Portland Trailblazers batok Denver Nuggets, 99-82, Golden State Warriors batok Orlando Magic, 110-100, ug Philadelphia 76ers batok LA Clippers, 109-105. (AP, ESL)

Gipatik sa mantalaang Superbalita Cebu Nobyembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments