Minglanilla, San Fernando sa finals | SunStar

Minglanilla, San Fernando sa finals

Time to read
1 minute
Read so far

Minglanilla, San Fernando sa finals

Wednesday, December 06, 2017

Archangels. Ang Minglanilla Archangels, ang kampiyon sa 1st Cebu Governor’s Cup, nagtinguha karon nga makaangkon sa ilang ikaduhang sunodsunod nga titulo human kini masulod sa best-of-three finals sa 2nd Congressman Samsam Gullas nga sugdan karong gabii sa Minglanilla Sports Complex diiin ilang ikasangka ang an Fernando. (Jun Migallen)

GIPALAGPOT sa host Minglanilla Archangels ang defending champions Talisay City Aquastars, 96-87, niadtong Martes sa gabii sa cross over semifinals round aron paglangkat og lingkuranan sa best-of-three finals sa tinuig nga 2nd Congressman Samsam Gullas Cup Inter-cities/Municipalities basketball championships 20-under sa Minglanilla Sports Complex.

Ang Archangels ni coach Edi­to Salacut, nga maoy top-seed sa ilang division, hugot nga na­kigkombati sa Aquastars ni coach Ronald Bucao sulod sa u­nang duha quarters apan naka­kita og igong lungag sa sayong bahin sa third quarter nga maoy ilang gihimong agianan paingon sa makutas nga kadaugan.

Si Steve Nash Enriquez, ang scoring leader sa Archangels, sa makausa pa mipakita sa iyang kaidlas sulod sa korte ug mipakatap og 32 puntos, pipila niini sa mga krusyal nga mga minutos nga maoy na­kapainat sa ilang labaw.

Nakaposte sa ilang pinakadakong labaw ang Minglanilla, 69-57, sa pagsira sa third quarter apan ang 8-0 run nga gipahagsa sa Talisay sa tungatungang bahin sa fourth quarter maoy nagduslit sa dakong hulga sa Archangels, 67-71.

Dili pa igo, misikit ang Talisay, 89-85, sa katapusang 1:29 segundos sa duwa apan didto ra kutob ang ilang pagpahudlat human si Enriquez nakakita og ayuda gikan nila ni Laspuna, Basister ug Gilbuena aron pag siguro sa kadaugan.

Ikasangka sa Minglanilla sa finals ang San Fernando nga mipukan usab sa host Naga City, 85-83, sa laing cross-over semifinals sa ENAN/Naga City Sports Complex.

Human matabla, 83-83, sa kata­pusang 13 segundos, nag-ung-ong na gyud unta sa kada­u­gan ang Naga apan sa kalit lang nitidlom ang ilang pagla­om human kini makahimo og inbound violation nga naghatag og kahigayunan sa San Fernando.

Wa mag-usik og panahon, kal­­madong mipasulod sa iyang bayanihong itsa si John Saramosing nga nakapahugyaw sa ilang mga dumadapig.

Sugdan karong gabii ang Game One sa best-of-three finals diin ang Minglanilla maoy mo-host sa San Fernando diha sa Minglanilla Sports Complex samtang ang Game 2 ipahigayon ugma sa San Fernando Sports Complex.

Kon dunay Game 3, mobalik ang series sa Minglanilla Sports Complex sa Dominggo.

Mga puntos

(First game)
Minglanilla (96) - Enriquez 32, Laspuna 13, Basister 12, Gilbuena 8, Castro 8, Eredera 9, Capara S4, Daclan 4, Cabradilla 4, H. Castro 2
Talisay City (87) - Tan 18, Bucao 17, Minerva 10, Bacasmas 8, Marzon 8, Beduya 8, Deiparine 8, Singson 5, Bri­gondo 2, Briones 2, Obrero 1

(Second game)
San Fernando (85) - Toquero 21, Saramosing 19, Soreso 16, Pasilan 12, Intong 7, Bolo 6, Salo 2, Geraldino 2
Naga (83) - Visayas 24, Navales 15, Delantes 12, Padilla 11, Flores 8, Abellanosa 6, Dela Cerna 4, Alingalan 2, Pacquiao 1. (JBM)

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments