Westbrook nagbangis | SunStar

Westbrook nagbangis

Time to read
1 minute
Read so far

Westbrook nagbangis

Wednesday, December 06, 2017

Hansak. Wa na kapugngi si Oklahoma City Thunder guard Russell Westbrook sa Utah Jazz ning aktuha ug yano kining nakahansak sa bola. Ning sangkaa, gimugna ni Westbrook ang iyang ikapitong triple-double aron agakon ang Thunder sa kadaugan. (AP Photo)

GIMUGNA ni Russell Westbrook ang iyang ikapitong triple-double sa season aron pangulohan ang kadaugan sa host Oklahoma City Thunder batok sa Utah Jazz, 100-94, kagahapon sa National Basketball Association (NBA).

Ang kasamtangang MVP bangis nga nagpakatap og 34 puntos, 14 assists ug 13 rebounds aron pabangunon ang Thunder gikan sa 17 puntos nga pagkalubong ug isaka ang rekord niini sa 11-12.

Si Paul George nidugang og 21 puntos, niamot og 20 puntos si Steven Adams samtang nihatag og 14 puntos si Carmelo Anthony alang sa Thunder.

Ang Jazz, nga nahagbong sa 13-12 nga baraha, gipangulo­han sa ilang impresibong roo­kie nga si Donovan Mitchell, kin­sa nagpauwan og 31 puntos.

Niamot og 16 puntos si Joe Ingles alang sa Jazz.

Naglabaw ang Jazz sa halftime, 47-39, unya mas nanginit sila sa 3rd quarter aron inaton ang ilang labaw ngadto sa 72-55.

Nagbangis si Westbrook ug iyang gipahakan ang labaw sa Jazz ngadto sa 68-80 pagtiklop sa 3rd quarter.

Sa 4th quarter, nakadawat og saktong suporta si Westbrook gikan sa iyang mga kauban hangtod nga nakontrolar sa Thunder ang duwa sa hinapos nga bahin.

Wizards 106, Trail Blazers 92

Sa Portland, nagpakatap og bag-ong career-high nga 51 puntos si Bradley Beal aron agakon ang Washington Wizards ngadto sa kadaugan batok sa host Trail Blazers.

Si Beal nimugna sab og 21 field goals, usa sab ka ca­reer-high, ug lima ka three-pointers.

Ang Wizards ug Trail Blazers pareho nang naggunit og 13-11 nga baraha.

Ang Trail Blazers gipangulohan ni Damian Lillard pinaagi sa iyang 30 puntos.

Nawad-an og haligi sa ilawom ang Trail Blazers dihang naangol ang ilang sentro nga si Jusuf Nurkic sa tungatungang bahin sa 4th quarter. Nagbilin siya og 15 puntos sa iyang pagbiya.

Raptors 126, Suns 113

Sa Toronto, nipupo’g 20 puntos matag usa sila si Kyle Lowry ug DeMar DeRozan aron pangulohan ang kadaugan sa host Raptors batok sa Phoenix Suns.Si Lowry nimugna sab og 10 ka assists.

Doble nga sagpa ang naangkon sa Suns gumikan kay gawas sa ilang kapildihan, naangol sab ang ilang labing sinaligan sa opensa nga si Devin Booker.

Nakasinati og angol sa iyang tiil sa nahabiling 2:40 minutos ug giagak kini sa iyang mga kauban aron makalakaw. (AP, ESL)

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments