Melindo gustong makig-rematch | SunStar

Melindo gustong makig-rematch

Time to read
1 minute
Read so far

Melindo gustong makig-rematch

Wednesday, January 03, 2018

ANDAM si ALA fighter Milan “El Metodico” Melindo (37-3, 13KOs) kon motanyag og rematch ang kampo ni Japanese Ryoichi Taguchi (27-2-2, 12KOs).

Mao kini ang gipabuhagay sa head trainer sa ALA stable nga si Edito Villamor kagahapon sa pagpakighinabi ning mantalaan sa Facebook messenger.

Sa premirong away niadtong Dominggo sa Tokyo, Japan, gilupig ni Taguchi si Melindo pinaagi sa unanimpus decision aron usahon ang World Boxing Association (WBA) ug International Boxing Federation (IBF) junior flyweight titles.

Hinuon giklaro ni Villamor nga wala mahisguti ang rematch human sa premirong away apan alang kaniya, dili halayo ang posilidad nga mahitabo ang rematch.

“Nindot man ang ilang a­­­way, nalingaw ang mga tawo. Maayo ang gipakita ni Milan pero nalupig lang gyud mi sa last four rounds nga mao gyud unta’y importante,” matod ni Villamor.

“Kon naa’y rematch, nindot ni para sa Japan boxing ug sa whole world kay named fighter na man gyud si Milan. I’m hoping nga mo-offer og rematch ang kampo ni Taguchi.”

Masaligon si Villamor nga makabangon ra dayon si Me­lindo gikan ning maong ka­pakyasan.

“World class fighter na man gyud si Milan, he’s a named fighter. I’m sure nga dili mag­lisod ang ALA management nga makakuha og dagkong away para ni Milan,” pasabot ni Villamor.

Lakip sa nalantawang posibleng sunod nga tahas ni Melindo mao ang rematch sa laing dekalidad nga Japanese fighter nga si Akira Yaegashi.

Si Yaegashi maoy giilugan ni Melindo sa IBF junior flyweight title pinaagi sa impresibong 1st round TKO nga kadaugan niadtong Mayo 21 sa miaging tuig.

Nakanayon si Villamor nga seguradong naglungotlungot nga makabawos ang kampo ni Yaegashi nga makabawos lang Melindo.

“Puwede sab mag-rematch sila si Milan ug Yaegashi sa usa ka title eliminator or regional title fight,” dugang ni Villamor.

“Actually sa status karon ni Milan, daghang dagkong opportunities ang iyang makuha. I’m confident nga ma-world champion ra pagbalik si Milan,” matod ni Villamor.

Sa kasamtangan, si Melindo mopahuway una samtang mag­huwat sa kon unsa’y la­kang nga pagabuhaton sa ALA Promotions sa usa sa dekalidad nga mga boksidor niini.

Kon wala’y kausabang na­hitabo, si Melindo nabalik na sa Sugbo kagabii gikan sa iyang kapakyasan sa Japan. (ESL)

Gipatik sa mantalaang Superbalita Cebu Enero 04, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments