Wa'y kaluya | SunStar

Wa'y kaluya

Time to read
1 minute
Read so far

Wa'y kaluya

Sunday, January 14, 2018

HARI UG REYNA. Nagpahulagway ang hari ug reyna sa 2018 Cebu Marathon kagahapon nga sila si Rafael Pescos (wa) ug Lizane Abella (tuo) human sa ilang malampusong pagdagan sa matag tuig nga lumba. Ang duha parehong sakop sa Spectrum Runner’s Club. (Tampo nga hulagway)

IKATULO na kining marathon nga gidaganan ni Rafael Pescos sulod lang sa 10 ka mga adlaw apan wala giha­pon siya’y kaluya ug na­daog niya ang men’s local 42-kilometer category ka­ga­hapon sa 11th Cebu Ma­ra­thon sa Cebu Business Park.

Si Pescos, kinsa maoy pambatong runner sa Spectrum Runners Club ug usa sa nag-unang runners sa Sugbo, mihu­man sa lumba sulod sa du­ha ka mga oras, 42 ka mga mi­nutos ug 54 ka mga segundos aron langkaton ang ikaduha niyang sunodsunod nga titulo.

Sa premiro pa lang nga kilo­metro, misutoy na si Pescos ug nakadistansya na siya gikan sa iyang nga kompetensya.

Pag-abot niya sa finish line, nabiyaan ni Pescos og ka­pin sa 12 ka mga minutos ang nagsunod kaniya nga si Azlan Pagay, kinsa mioras og 2:55:16. Ang 3rd placer mao si Paul James Zafico, kinsa mioras og 3:03:17.

“Chamba lang (I got lucky),” matod ni Pescos sa media human sa lumba. “Naguba man sila so I just took advantage of it.”

Sa wala pa ang Cebu Marathon, si Pescos midagan sa Lacastellana Marathon niadtong Enero 4 sa Negros Occidental ug Baybay City Marathon sa Leyte sa miaging semana.

Nagkanayon si Pescos nga wala siya magdahom nga madaog niya pagbalik ang titulo sa Cebu Marathon.

Ang kauban ni Pescos sa Spectrum RC nga si Lizane Abella midominar sab sa women’s 42K event pinaagi sa oras nga 3:16:25.

Nabiyaan ni Abella og kapin sa 15 ka mga minutos ang nagsunod kaniya nga si Ruffa Sorongon, kinsa adunay oras nga 3:33:13. Ang 3rd placer mao si Judycel Reducto, kinsa adunay oras nga 3:33:46.

Matod ni Abella, kinsa lumad nga taga Minglanilla, Cebu, nagkanayon nga grabe ang iyang kalipay mao kini ang labing una niyang titulo sa full marathon.

Laing runner sa Spectrum RC nga si Prince Joey mikawat sab og atensyon pinaagi sa pagdaog sa men’s 21K local category sa ofras nga 1:13:42.

Nagsunod kang Joey mao sila si Joseph Arnel Emia (1:19:13) ug Augustin Ychon (1:22:21.)

Midaog sa women’s 21K mao si Lovely Andrin pinaagi sa oras nga 1:39:34. Nalupig ni Andrin sila si Jennifer Paloma (1:49:37) ug Rue Panibon (1:49:38).

Ang mga ningpatigbabaw sa 10K mao sila si Ruel Algu­fera (35:00) sa men’s ug Melody Perez (43:18) sa women’s.

Ang mga ningkampiyon sa 5K mao sila si Erlencito Pionela sa men’s category ug Mary Joy Loberanis sa women’s.

“I’m very happy because all the categories we were the champion. To the Spectrum members just continue training because there are a lot of running events this year,” matod ni Dr. Gerry Mayo, presidente Spectrum RC.

Sa 42K foreign division, si Eric Chepsiror (2:28:50) maoy naghari sa men’s event samtang si Kyoko Otsuka (3:47:09) sa women’s race. (RSC, ESL)

Gipatik sa mantalaang Superbalita Cebu Enero 15, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments