Cavs mipahilum sa OKC Thunder | SunStar

Cavs mipahilum sa OKC Thunder

Time to read
1 minute
Read so far

Cavs mipahilum sa OKC Thunder

Wednesday, February 14, 2018

James batok George. Si Cleveland Cavaliers forward LeBron James (23) nga giguwardiyahan sa star player sa Oklahoma City Thunder Paul George (13) niining aktoha atol sa ilang duwa kagahapon sa NBA basketball game didto sa Oklahoma City. (AP)

PADAYON ang kainit sa mga bag-ong Cavaliers, ug sa ikaduhang sunodsunod nga higayon ila na usab gipakita ang solidong suporta sa dihang gipahilom sa Cleveland ang Oklahoma City Thunder, 120-112, ka­gahapon sa nagpadayon nga NBA 2018 season.

Si LeBron James kinsa nakakuha og igong abag sa mga batan-ong ug bag-o niyang kauban, mipuga og 37 puntos, walo ka rebounds ug unom ka assists aron irehistro ang ilang ikaupat nga nagkutayng kadaugan nga gituldokan sa duha ka bayanihong itsa nila ni Jordan Clarkson ug Rodney Hood.

Mahulagway nga usa ka matam-is nga panimalos ang gihimo sa Cavaliers ngadto sa Thunder kinsa yanong midabo-dabo kanila niadtong Enero 20, 148-124, nga maoy usa sa makauuwaw nga kapildihan, pila lang ka adlaw sa wala pa mohimo sila og lahugay.

Niadtong Dominggo, sa unang duwa sa ilang mga bag-ong nakuha, ang Cavaliers milampornas sa Boston Celtics, 121-99. Sa Enero 3, gilubong ang Cavaliers sa Celtics og 14 puntos.

Ang beteranong si JR Smith mitali og 18 puntos ug ang Cavaliers misaka sa ilang standing ngadto sa 34-22.

Perming naglabaw ang Cavaliers bisan pa man og dihay mga higayon nga misuway ang Thunder sa paglabni sa bintaha, apan ang third quarter diin si Clarkson nakutlo og sunodsunod nga puntos maoy nahimong dalan aron pag-inat og balik sa labaw sa Cleveland.

Si Clarkson, sama kang Rodney Hood, mitali og 14 puntos sa kadaugan nga nagkapasagmuyo sa paghibalik nila ni Russel Westbrook ug Carmelo Anthony kinsa bag-o pa lang nakabalik og duwa tungod sa injury.

Upat ka sakop sa Thunder ang adunay 20 puntos o kapin. Si Paul George adunay 25, Anthony 24, Steven Adams 22 ug Westbrook nga mitapos sa duwa nga may 21.

Giablihan ni Thunder coach Billy Donovan ang fourth quarter pinaagi sa pagdungan og pasulod nila ni George ug Adams samtang si Cavs coach Tyronn Lue migamit sa iyang mga bag-ong kaplag nga sila si Clarkson, Larry Nance Jr. Hood uban nila ni Jeff Green ug Kyle Korver.

Giikan sa kuwatro nilang labaw, ang Cavs mipainat niini ngadto sa 100-90 sa wa pa ipasulod og balik si LeBron James sa nahabiling 8:12 sa duwa.

Ang tres ni Clarkson sa nahabiling 3:22 maoy nakahulma sa 111-100 nga labaw samtang ang presensiya ni Nance sa ilawom nga bahin nakahatag usab og problema sa Thunder.

Duha ka sunodsunod nga turnovers sa Cleveland sa hi­matyong segundos ang mihudlat sa Cavaliers apan ang fastbreak nga hansak ni Nance gikan sa halayo nga pagsalibay sa bola ni Smith sa pikas goal maoy nagselyo sa ilang kadaugan.

Sa laing mga duwa, gipabugnaw sa Toronto Raptors ang Miami Heat, 115-112, samtang gipatugdong usab sa Milwaukee Bucks ang Atlanta Hawks, 97-92.

Way kaluoy nga gibungkag sa Houston Rockets ang Minnesota Timberwolves,126-108, ug gibuntog sa Sacramento Kings ang Dallas Mavericks, 114-109. (JBM)

Gipatik sa mantalaang Superbalita Cebu Pebrero 15, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments