SA wa damha, gipakaging sa Sacred Heart School-Ateneo de Cebu Magis Eagles ang no.1 seed ug title-contender Ateneo de Manila Blue Eaglets, 72-70, sa ilang Elite 8 knockout match sa NBTC Finals niadtong Miyerkules sa gabii sa SM Mall of Asia Arena.
Si Errol Pastor maoy nahimong mahait nga hinagiban sa eight-seeded Magis Eagles human kini midakdak og 21 puntos ug walo ka rebounds nga giduyogan usab sa 18 puntos ni Wilson Yu aron paghulbot og luna sa semifinals round.
Apan kagahapon, nasugamak sa dakong kapildihan ang Cebu-based team sa dihang gilubong kini sa National University Bullpups, 71-47, sa ilang semifinal match.
Sukwahi sa ilang gipakita batok sa Ateneo de Manila, ang Magis Eagles bugnaw kaayo sa ilang mga outside shooting nga maoy nakapugdol sa ilang opensa.
Si Gerry Abadiano, kanhi magduduwa sa Adamson sa wa pa kini mobalhin sa NU, mipuga og 23 puntos, 17 niini sa second half, samtang midugang og 17 si Terrence Fortea alang sa NU kinsa sayong nakaposte o 38-19 nga labaw sa second half.
Ikaharong sa Bullpups sa finals ang La Salle Greenhills kinsa milubong usab sa NCAA champion Chiang Kai Shek College sa laing semis match kagahapon.
“They played really well. Masyadong mataas ‘yung three-point percentage nila. That’s one thing we have to control. Siyempre ‘yung La Salle champion sa NCAA. We really need to prepare for them,” matod ni NU coach Goldwin Monteverde.
Si Eroll Pastor, nga maoy nanginit og maayo sa dihang ilang gibuntog ang Ateneo-Manila, nangulo sa Magis Eagles nga may 14 puntos ug 14 ka rebounds, apan siya lang ang bugtong naka double-figure sa Cebu-based squad kinsa mipukan sa San Beda sa finals sa niaging tuig.
Mga puntos:
NU (71) - Abadiano 23, Fortea 17, Malonzo 7, Gonzales 5, Amsali 4, Oczon 4, Tamayo 3, Manalang 2, Javillonar 2, Minerva 2, Quiambao 2, Felicilda 0. SHS-ADC (47) - Pastor 14, Yu 6, Manaytay 6, Colonia 6, Diaz 6, Mantua 3, Gesalam 3, Bersaluna 2, Visser 1, Javelosa 0, Nacua 0, Chua 0, Yu 0. Quarterscores: 21-16; 33-28; 53-40; 71-47. (JBM)