Banal, Perez nagkainitay

INIT na kaayo ang eksena sa official weigh-in pa lang, unsa na kaha kon ibabaw na sa ring.

Human yanong nakuha nila ni AJ “Bazooka” Banal ug Nicaraguan Luis “Demolition Man” Perez ang gitugot nga timbang sa bantamaweight kagahapon sa Atrium sa SM City, maisugong nagtinutokay ang duha alang sa naandan nang pagpahulagway.

Apan sa kalit lang, misinyas si Perez kang Banal nga mura’g nagputol og liog isip timailhan nga iya gyung demolison ang lumad nga taga Ermita, Cebu.

Tatawng nahagit sa gihimo sa bisitang boksidor, gisundog ni Banal ang sinyas ni Perez dili lang ka usa, kon dili duha gyud ka higayon gamit ang iyang wala ug tuo nga kamot.

Karong gabii sa Waterfront Hotel sa Lahug, Cebu City, dili na senyas, seguradong mainitong binukokay ang masaksihan sa panag-abot na gyud sa duha ibabaw sa ring alang sa main event sa “Pinoy Pride” boxing promotion.

“Patayin natin yan,” matod ni Banal sa usa ka interbyu human sila nagpahulagway ni Perez.

Gipasabot ni Banal nga sa press conference pa lang, nahagit na gyud siya sa mga pasiatab ni Perez hinungdan nga nagpanikad na gyud siyang makigsumbagay niini aron makita ang katag.

Ang manager ni Perez nga si Mario Antonio Fonseca nagkanayon nga sa iyang tan-aw, matikangkang na si Banal sa ikaupat nga round o pataas.

“We’re ready to demolish Banal. From fourth round, we will go for a knockout,” matod ni Fonseca pinaagi sa usa ka interpreter.

Nahagit sa pasiatab sa kampo ni Perez, si Banal nagkanayon nga iyang tumbahon si Perez sulod lang sa upat ka rounds.

“Kon unsa’y ilang gisulti nga knockout-ton ko nila, akong palabwan. Kanang round nga ilang gisulti, mas ubos pa ang akoa ana,” matod ni Banal.

Si Banal (21-1-1, 17KOs) mitimbang og 116 lbs. sa weight limit nga 120 lbs. samtang si Perez (26-4, 17KOs) mitimbang og 117 ¾ lbs.

Ang stablemate ni Banal nga si Mark Jason Melligen (19-2, 13KOs) mibahad sab nga iyang pakamangon ang iyang kontra nga si Mexican Bladimir Hernandez (21-3, 17KOs).

“Bigay ko sa kanya mga limang rounds lang,” matod ni Melligen, kinsa karon pa makabalik og away dinhi sa Sugbo human sa taastaas nga panahon. Kapin na sab sa tuig nga sa Amerika nagkampanya si Melligen.

Laing kaintapang away sa promosyon mao ang tali nila ni Jason Paraga sa ALA gym (23-1, 11KOs) batok Thai Sapapetch Sor Sakaorat (20-6, 11KOs) ug Larry Canilla sa ALA gym (15-2, 13KOs) batok sa beteranong si Ramie Laput (38-4, 17KOs).

Labing seguro, mokawat na sab og dakong atensyon ang presensya ni Jun Entor, kinsa naila na sa iyang mga sagol-pakatok nga aksyon ibabaw sa ring. Makigharong siya kang Romano Gelig.

Magsangka sab sila si Wilberth Loberanes batok Joel Lagusan, Ryan Canillas batok Renjie Sabanal ug Rey Melligen batok Avelino Valleser.

Ang promosyon gitambayayungan pagdalit sa ALA Promotions ug television giant ABS-CBN.