Celtic kaging

NASUGAMAK ngadto sa lain na usab nga kapildihan ang Boston Celtics human kini mapukan sa underdog nga Houston Rockets, 108-102, diha mismo sa korte sa Boston kagahapon sa NBA.

Si Aaron Brooks mipaksit og 24 puntos, lakip na ang duha ka free throws sa katapusang 18 segundos aron pagtubag sa rally sa Boston ug pagsiguro sa kadaugan nga maoy nagputol sa lima ka sunodsunod nga kapildihan sa Rockets bisan wa pa ang ilang leading scorer nga si Kevin Martin.

Sa kapildihan, ang Celtics (28-9) nailogan sa Miami Heat (30-9) sa unang luna sa Eastern Conference. Kadto maoy ikaduhang sunodsunod nga kapildihan sa Celtics kinsa nanghinaot nga makabalik na og duwa si Kevin Garnett ugmang adlawa batok sa Sacramento Kings.

Si Ray Allen miyagyag og 19 alang sa Boston samtang si Marquis Daniels mipuga og 19 nga maoy iyang pinakataas nga puntos sa season.

Gikan sa usa ka puntos nga labaw, ang Rockets mipainat sa ilang bintaha ngadto sa 106-94, 3:13 ang nahabilin, apan nahulga kini sa dihang nagpulipuli og pangigo sila si Allen ug Paul Pierce sa three-point area aron pagpakubol sa labaw ngadto sa kuwatro puntos.

Sa laing bahin, gipakaging sa Charlotte Bobcats ang Memphies Grizzlies, 96-82, sa pagpangulo ni Stephen Jackson kinsa may 27 puntos.

Ubos sa bag-ong coach nga si Paul Silas ang Bobcats nagsigi na og panaog. Kagahapon moabot lang og 1,000 ka mga fans ang nakasaksi sa maong kadaugan tungod sa snow nga nakabalda sa mga fans nga gusto untang motan-aw sa duwa.

Sa paggiya ni Silas, ang Bobcats mirehistro na og lima ka daog batok sa duha ka pildi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph