Gikahinaman

NALANTAWAN nga mahimong match-up of the year ang panagsangka sa main event sa “Pinoy Pride 2: Best of the Best” boxing promotion nga gikatakda karong Nobiyembre 27 sa Waterfront Hotel sa Lahug, Cebu City.

Gitumbok mao ang panaparang nila ni Milan “El Metodico” Melindo sa ALA stable batok sa kanhi world champion Carlos “El Olympico” Tamara sa Colombia.

Gikonsiderar sila si Melindo ug Tamara nga duha sa labing maayong mga boksidor sa tibuok kalibutan sa ilahang timbang.

Kahinumdoman nga si Tamara maoy nag-ilog sa world light flyweight title ni Brian “The Hawaiian” Villoria pinaagi sa 12th round TKO nga kadaugan.

Ang Colombian lupig unta sa scorecards sa maong away apan iyang gipakita ang never-say-never nga kinaiya ug iyang napaundang si Viloria sa katapusang round.

Hinuon sa premiro niyang depensa, napilde si Tamara ni Argentinian Luiz Alberto Perez pinaagi sa split decision niadtong Mayo.

Samtang ang gitawag og “El Metodico” naila na kaayo sa iyang inutok nga away ug hinan-ay nga pagpukan sa iyang kaaway.

Ang iyang kaalam sa science of boxing nakaagni og respeto gikan sa mga eksperto sa boksing sa tibuok kalibutan.

Si Melindo, nga kanhi gisaway sa kakuwang sa iyang kusog power, mipabaraw sa iyang mga kritiko pinaagi sa pag-ilog sa korona ni WBC Youth International champion American Anthony Villareal pinaagi sa unanimous decision.

Ang Melindo-Tamara nakahimo na og kalibutanong kasikas sanglit adunay langyawng mga media ang nagtinguhang mo-cover sa away.

Dili sab magpabangbang ang mga away sa undercard kay pulos sab kini nagsaad og kulbahinam nga aksyon.

Ang maong promosyon gidalit sa ALA Promotions ug ABS-CBN Sports inabagan sa Cebu City Government, Waterfront Hotel, SM City, International Bar Complex, Mooon Café’, Hukad, Sports Exchange Bar and Grill ug Y101 FM. (PAC)