Migallen: Ang tuig 2010

KON imong lantawon ang kinatibuk-ang panid sa dagan sa paugnat sa kusog sa tuig 2010 dili lang sa Sugbo kon dili sa tibuok nasod, atong maaninaw nga adunay mga kapakyasan nga natagamtam ang atong mga garbong atleta.

Apan di usab nato malilong ang mga kalampusan nga nahikyad usab sa pipila kanila nga naghatag og dakong kadungganan sa yutang Pilipinhon.

Ning pagsulod sa tuig 2011, atong panghinaot nga ang kapukanan o kapakyasan maoy naghatag og leksyon aron pagkab-ot sa kadaugan.

Atong abayan ang panultion nga nagkanayon nga ‘sa kapildihan nagpahipi ang dakong kalampusan.”

Dinhi sa Sugbo, ang kalit nga pag-boom sa running events nga gani pipila ka mga higayon kini magkadungan og pahigayon.

Gawas sa running events, di usab malalis ang sunodsunod nga mga international boxing events nga gipasiugdahan sa ALA Boxing Promotions.

Ang mga motocross nga gidalit usab nila ni Sir Lou Ornopia ngadto sa mga nakalainlaing lungsod sa probinsiya sa Sugbo maoy permi usab masaksihan sa mga Sugboanon.

Hinaot nga kini magpadayon ning tuiga ug ingon man mahimo usab nga sumbanan uban.

Ang tuig 2010 mao usab ang tuig nga lisod nakong kalimtan sukas sa akong pagsulod sa media sulod sa hataas nga katuigan.

Kini tungod kay dinhi ning tuiga, napahigayon nako ang una nakong international boxing coverage.

Niadtong Nobiyembre 13, kita na mismo ang nangunay sa pag-cover sa away ni Manny Pacquiao ug Antonio Margarito didto sa Cowboys Stadium sa Dallas, Texas.

Human sa maong away, nakahigayon usab kita sa pagbisita ug pagtan-aw sa ubang mga duwa didto sa Estados Unidos nga nakapadugang sa atong eksperiyensiya.

Personal kitang nakakita og American football (rugby) ang no. 1 sport sa Amerika nga gisaksihan og kapin sa 100,000 ka mga fans diin ang Dallas Cowboys midaog batok sa Detroit Lions. Ato usab nga nadaklitan sa pagtan-aw ang Ice Hockey.

Labaw sa tanan, linawas usab natong gisaksihan ang duwa sa NBA tali sa Dallas Mavericks ug New Jersey Nets diin midaog ang Dallas.

Sa wa pa usab kita mobalik dinhi sa Pilipinas nakahigayon usab kita sa pagbisita sa makasaysayon nga Madison Square Garden ang dapit diin didto permi ipahigayon ang mga away ni Muhammad Ali.

Kini maoy pipila lang ka mga daklit saysay ug mga makasaysayong butang nga atong nasinati sa tuig 2010.

Hinaot pa unta nga ning pagtaak sa tuiga 2011 magpadayon o madugangan pa ang mga maanindto natong kasinatian.

Greetings….Pahalipay ngadto sa pamilyang Abellanosa (kabanay nila ni Anastacio ug Catalina Abellanosa sa Cabreros, Basak) sa pagpahigayon sa ilang family reunion kagabii. Gikan sa nagpangga ug nagmahal ninyong igsuon Venus Abellanosa nga atoa na karon sa Canada.

(Email add:junmigs0622@yahoo.com)