Mismatch

HUMAN sa iyang impresibong 2nd round knockout nga kadaugan batok kang Paul Williams ning bag-uhay lang, si WBC middleweight champion naapil na sa mga kandidato sa posibleng sunod nga makontra ni pound-for-pound champion Manny Pacquiao.

Gani sa interbyu sa ABS-CBN, ang 8-time world champion nga Pinoy nipadayag nga interesado sab siyang makig-away kang Martinez bisan pa’g dako kaayo kini kumpara kaniya.

Hinuon gitino ni Pacquiao nga posibleng ubos sa 150 pounds kombatihon ang away. Si Martinez kasamtangang nagkampanya sa 160 pounds.

Apan sa interbyu sa www.boxingscene.com, nagkanayon si Martinez nga lisod madayon ang away kay gamay ra gyud kaayo ang Pambansang Kamao sa Pilipinas kumpara kaniya.

Tungod sa dakong depenrensya sa gidak-on, nagtuo si Martinez nga lisod madayon
ang away.

Si Martinez (46-2-2, 25KOs) adunay gitas-on nga 5’10” unya tatawng mas dako ang lawas niini kumpara sa 5’6” nga si Pacquiao (52-3-2, 38KOs).

“Manny Pacquiao is too small. It would be a mismatch. I don’t believe that it will ever happen,” matod ni Martinez.

Ang manager ni Martinez nga si Sampson Lewkowicz nagtuo nga kaya ra gyung tumbahon ni Martinez ang Pinoy boxing superstar.

“Sergio would never fight Manny Pacquiao because [Martinez] would knock him out,” matod ni Lewkowicz.

Giklaro ni Martinez nga mas interesado siyang makig-away kang Floyd Mayweather Jr. kay dili kaayo dako ang deperensiya sa gidak-on.

“But Floyd Mayweather? Most likely, that would be a fight that we could make. He’s a great fighter, and I would love to do it.”

Si Pacquiao, kinsa usa ka kongresista sa Sarangani Province, nipadayag nang daan nga bisan kinsa iyang suklan.

Iyaha na lang gipiyalan ang iyang promoter nga si Bob Arum sa paghan-ay sa sunod niyang tahas.