Talk to Papa Joe: Nangasina

DEAR Papa Joe,

My name is Lyra, taga Capitol. I am 33 years old. Ang akong problem is about work. Ang akong workmates man gud sige og panglibak sa akong boss nga edaran na ug usahay baya madala ko sa ilang mga comments. Kuan man gud, kining akong amo kay nasubrahan sa ka boutan. Kusog kaayo ni siya motabang og mga tawo. Mga anak sa iya lang naka ila iya dayon kining paeskwelahon, hatagan og allowance ug patrabahuon sad sa among office isip errand.

Karon ang akong officemates magsige na lang og panglibak kumo ang itabang sa akong amo sa lain, kami na lang daw tabangan kay may gastuhan sad mi nga di sad namo kaya. Kay kini siya manghuwam ni og kwarta usahay sa office para itabang. Tinuod masina mi kay nganong adto man sa lain siya motabang. Tuod na naa man mi pero di baya ni siya sad modawo if imo gyud hangyuon.

Kada adlaw mao na ni among topic always sa opisina. Para ba nimo, Papa Joe, makatarunganon ba ni iyang gibuhat ug ang amo sad gibuhat? Duna kaha miy katungod mobadlong niya nga mas maayo kami ang i-prioritize? Ang akong bana masuko na hinuon nako kon ngano daw mag-apil-apil ko nga wa koy katu­ngod. Unsa may angay nakong buhaton? Please tambagi ko.

LYRA

Day Lyra,

Maayong adlaw kanimo, no. Well kanang imong probs kay common na sa opisina, labi na magpundok na mong mga babaye. Hehehehe. Bitaw dili na na ninyo problema kinsa iyang gitabangan bisan mangutang pa na siya sa inyong opisina kay iya sad nang tulubagon if magkinaunsa. Ang angay ninyong atupagon mao ang inyong trabaho.

Samtang gadawat mo og sweldong sakto, ayaw na mo panghilabot sa tawo. Maayo pa gani siya kay may nabuhat nga maayo. Nakatabang pa siya sa lain apan kamo nagpakita sa pagkasinahon ug immature. Kon dili nimo mabadalong ang imong mga kauban, ayaw nalang og apil-apil. Mas maayo magpakahilom na lang ka ug buhata imong duty sa imong trabaho.

Sakto ang imong bana, mapurdoy man tuod na inyong amo sa pagsige og tabang, pero iya sad gipatambok iyang kalag sa kahitas-an kay matinabangon siya. Kamo?

So, mao na akong matambag nimo ug kon mahimo sunda imong amo sa pagtabang sa wala gyud. Maayo mo kay naa pa moy trabaho. Diri na lang kutob ug daghang salamat kanimo.

PAPA JOE

(para sa inyong tampo ipadala lang sa papajoelon@hotmail.ph o joelonrt@hotmail.com)