Sugilanon: Sobreng may kuwarta

Wednesday, February 8, 2012

Alcea Maningo
Cangyan, Carmen, Cebu

SABADO, 3 p.m. Miuna paggawas si Dindo sa Gaisano Ayala. Mipadulong siy sa west surface parking area diin tua ang iyang kotse. Adto lang siya maghuwat kang Senda, iyang kapikas nga namalit pa og grocery. Nagkugos siya sa iyang apo nga si Fiona, tres anyos. Dihang molabang na unta sila sa karsada may puting butang nga nakapadani sa iyang pagtagad. Nagligdas sa karsada ang puting sobre nga medyo tambok. Mikuba ang iyang dughan sa kahinam. “Basig kuwarta sulod ini,” ni Dindo sa iyang kaugalingon.

Have something to report? Tell us in text, photos or videos.

Gibutang niya ang bata.

Naaninaw ni Dindo nga way mga tawo nagbarog sa duol. Way nagpakabana sa maong sobre.

Milakang siya paduol sa sobre. Dihang natungod na iyang tiil sa sobre, gihulog niya ang yawe sa kotse tupad sa sobre. Dayon gipunit niya ang yawe ug ang sobre. Gipikat niya ang sobre. Mga papel de banko ang sulod. Naniga iyang mga mata sa kahimuot. Adto niya ihapa sulod sa kotse. Gikuha niya sa sidewalk si Fiona ug misirit paglakaw paingon sa iyang kotse.

Giablihan niya ang kotse ug gipahiluna si Fiona sa passenger side sa front seat.

Sugdan na unta niyag ihap ang kuwarta dihang iyang nasiplatan ang duha ka batan-ong lalake nga nagpaingon sa iyang kotse. Giitsa niya ang sobre sa dashboard.

“Good afternoon, sir!” matod sa nag-una. “Ako si Tony Galo. Kining akong kauban akong kaklase nga si Greg Manto. Duna miy proyekto sa eskuylahan. Masscom among kurso. Gipa-interbyu mig mga tawo alang sa among term paper. Mahimo ba interbyuhon ka namo?”

Mipahiyom og hilaw si Dindo. “Okey lang. unsa may gusto ninyong masayran?” Gipangutana iyang ngalan, edad, civil status, adres ug trabaho.

“Chief accountant ko sa Amiraw Corp., usa ka dakong land developer sa dakbayan. May accounting firm ko sa Talamban ug nagtudlo sab og accounting subjects sa University of San Sebastian,” ni Dindo nga mibatig garbo.

“Sir, wa ka bay butang napunitan karon lang nga dili imo?” ni Tony.

Milad-ok sa iyang laway si Dindo. Nagpasiplat ang duha sa sobre.

“Tug-an lang sa tinuod, sir, kay di man sab ka kalimod,” ni Greg nga naggunit sa iyang selpon. Gi-replay ang video player sa selpon diin nakita si Dindo nga nagpunit sa sobre.

“Inyo diay ni?” gikuha ni Dindo ang sobre ug gitunol kang Tony.

“Amo ning hinuwaman, kabahin sa among eksperimento sa term paper.”

“Basig kuwarta o alahas ang sulod. Akong gisuta kon may ngan ug adres sa sobre aron mauli nako sa tag-iya,” pamakak ni Dindo.

“Unya nganong wa man ka mobalik sa mall aron itugyan kini sa sekyu?”

“Mangawat man gani ang uban o manulis hinuon. Kana pang gilantad na daan ug way tag-iyang nagagunit,” tug-an ni Dindo.

“Sige, sir, salamat sa imong paghatag higayon namo,” ni Tony, nanamilit.

Miabot si Senda nga nagbitbit sa kinumpra. “Kinsa to sila?”

“Ila kong gi-interbyu ug gipasidunggan kay gi­uli nako ang napunitan kong sobre nga puno sa kuwarta,” ni Dindo.

“Nganong gisaba pa man nimo? Kuwarta na sana, naging bato pa,” bagutbot ni Senda. Igo lang namid-ok si Dindo. (KATAPUSAN)