Sugilanon: Valentine’s night

Saturday, February 11, 2012

Alcea Maningo
Cangyan, Carmen, Cebu

ALAS kuwatro sa kaadlawon. Nakamata si Abeth dihang nakasaghid iyang walang bukton og balhibo nga init-init. Mibangon siya ug nakita niya sa dan-ag sa lamparilya nga gipulawan sa sala ang usa ka dakong iro nga buwagaw og bulok. Naglubog ang hayop dapit sa iyang wala. Naghagok pa ang iyang bana nga si Noel diha sa iyang tupad dinha sa sala. Nahibulong ug nahadlok si Abeth kon diin gikan ang iro. Nangluspad si Abeth nga midalig pikpik sa abaga sa iyang bana aron pukawon.

Have something to report? Tell us in text, photos or videos.

Kagahapon, petsa 13 sa Pebrero sa hapon maoy pag-abot nila dinhi sa balay ni Tiyo Wilben sa Malabago, lungsod sa Badian, sakay sa Ceres Bus. Nag-inusara kining balaya sa baybayon. Giatiman sila sa Lola Delia ni Noel ug ni Marjorie, ilang katabang.

Pagka gabii gipasiga ni Tiyo Wilben ang petromaks kay wa siya magpa-konektar og kur­yente. Lamparilya ug petromaks ang ilang suga. Nag-inom og tuba si Tiyo Wilben ug si Noel. Nagkanta-kanta si Noel nga giduyogan sa iyang uyoan sa gitara.

Tulo ka tuig nang minyo sila si Abet hug Noel. Si Noel usa ka seaman nga mibakasyon balig usa ka bulan. Wa pa silay anak. Giimbitar sila ni Tiyo Wilben nga anhi magsaulog sa Valentine’s Day sa iyang balay. Basin pag makahimo na silag bata.

Sayong buntag sa Pebrero 14 nanginhas sila si Abeth ug Noel. Gihakad ni Lola Delia ang mga unod sa salawaki, giputos og dahon sa saging ug giun-onan. Karon pa katilaw og inun-onang tihi-tihi si Abeth. Gikilaw ang guso ug gituwa ang mga kinhason.

Pagka gabii hayag ang buwan. Human sa panihapon nanuroy ang magtiayon sa baybayon. Nagsul-ob si Noel og bathing trunk; si Abeth sa iyang swimsuit nga two-piece. Puti ang mga balas. Nagtiniil silang nanuroy.

“Happy Valentine’s, love,” ni Noel nga migakos sa kapikas.

“Happy Valentine’s, too,” ni Abeth. Nag-akob dayon ang ilang mga ngabil. Nangyaka sila sa gibanig nga beach towel tungod sa dakong punoan sa Talisay. Way nakatugaw sa ilang kalipay.

DUGAYNG nakamata si Noel.

“Tiyo Wilben, kang kinsa man ning iro nga nias sulod?” nakasinggit si Abeth. Nakamata ta­nang nangatulog. Mitimbakuwas si Noel.

Giablihan ni Tiyo Wilben ang pultahan sa balay ug gibugaw ang iro, “Tse! Tse! Gawas!” Mibarog ang iro ug milakang padulong sa pultahan.

“Kinsay tag-iya adtong iroa, Tiyo?” ni Noel nga namahid sa singot.

“Wa mi kailag kinsay tag-iya, apan buotan man to. Di mangunsa.”

“Giunsa man to pagsulod dinhi?” ni Abeth.

“Wa gyud tay kalibutan kay puro man ta natulog,” ni Lola Delia.

“Apan nadungog na dinhi nga ungo kuno ang tag-iya adtong iroa. Unya ganahan molubog tupad sa babayeng mabdos,” timang ni Tiyo Wilben.

“Mao ba?” ni Abeth nga mitan-aw kang Tiyo Wilben ug Noel.

“Sa ato pa, mabdos diay ka, Love!” gipahiyuman ni Noel si Abeth.

“Basin pa,” ni Abeth nga misidlak ang mga mata sa kahimuot.

(KATAPUSAN)