Vallena: Cantipla 3

Saturday, February 11, 2012

BISAN kuwang sa tulog, nahinayon gyud mig kuyog sa akoang anak ug manghod sa among mga kauban sa forum sa CebuCycling pinangulohan ni Paul Baguio. Sayo ming nangmata. Mga alas 4 sa kaadlawon nagmata na mi kay layo man ang among abotan, sa Mambaling pa man.

Kami ra hinuon ni Rembert Entece, Ramon Villamor ug akong manghod ug kamaguwangang anak ang nagkuyog kay wa makatunga ang uban namong mga kauban. Sa 40 ka mga cyclist nga nagpalista, mga 26 ra ang naihap ni Paul nga nanunga.

Have something to report? Tell us in text, photos or videos.

Bisan mao ra toy nanunga, grabe ang kaalegre sa amoang biyahe. Way hunong nga tinungasay sa karsada sa Manipis sa hinayhinay, apan sila si Prince ug Val, misutoy lang. Ila ming nalabyan samtang nagtungas bisan uwahi ra kaayo sila kay duna pay gihuwat nga mga kuyog namo.

Wa pay alas 12, miabot na ming tanan sa Cantipla aron makatan-aw sa fight ni Nonito Donaire ug Wilfredo Vasquez nga nagdaog sa split decision. Pwerteng langasa namo, labina sa akoang amigo nga si Pokey nga nagsige og pakatawa.

Maorag mga bata

Ingon pa nila, ang mga lalake mo-mature physically, but mentally naa gihapon ang pagkabata. Bitaw, ang mountain biking nahimong duwa-duwa niadtong mahiligon og biseklita samtang magsuroysuroy sa lainlaing mga dapit.

Sama sa airsoft nga duwa sa mga dagko. Mao ni ang version sa pusil-pusil sa gagmay pang mga bata nga ang sounds gikan lang sa baba. Ang airsoft naggamit og mga replica nga pusil nga duna gyuy mga bala nga makapasakit sab.

Ang nakanindot sa mountain biking kay mahimo man nga mga bata ug dagko magkuyog. Pipila na ka mga higayon nga nakakita ko og mga amahan ug anak nga kuyog nga nag-mountain biking. Usa ni sa mga maayong paagi sa bonding. Maka-relate ang usag usa pinaagi sa biking.

Kon tan-awon nimo, ang pagtungas sa kabukiran, bisan di sayon ug kapoy pa kaayo, ingon sa duwa sa mga dagko nga ang huna-huna naa gihapoy partly pagkabata.

Bikog

Ang akong nasinati niadtong first climb, nausban na sab niadtong Dominggo. Apan mas grabe ang sa miaging semana kay maora kog giugbok sa karsada pag-dismount nako. Sa akong second climb akoa tong nalikayan kay nag-granny man ko.

Kaya pa sa akoang ginhawa ug tuhod pa unta, apan ang muscle cramps nagsugod na pagsaylo pa lang nako sa tunghaan sa Sudlon. Hangtod nga di na nako maaguwanta ang kasakit sa pagdayong abot sa tungason nga gitawag og “Buko-Buko sa Anay.”

Ni-dismount ko ug maorag mobuto ang akong mga paa sa kasakit. Wa ko molihok for five minutes aron mo-relax ang nerves ug muscles. Dihang okay na, akoang gitulod ang bike.

Pag-abot sa Cantipla, human nakog paniudto, akong gipaghiran og pinuga nga mga lemonsito ang affected parts sa akong tuhod ug paa. Unya nikaon sab kog asin aron mas moalibyo pa. Tuod man, nakaabot ko sa amoa nga wa nay cramps. Pero nagsige ko og atsi tungod sa katugnaw.

But the experience was worth it. Mobalik pa mi sa umaabot nga mga adlaw didto.