Sugilanon: Nangumedya si Kupido

Monday, February 13, 2012

Oliver P. Flores
Sogod, Cebu

NAGTAGHOY-TAGHOY si Art samtang nanudlay sa dakong salamin sa aparador sa iyang kuwarto. Unya gisud-ong niya ang iyang kaugalingon. Guwapo na kaayo siya. Angayan siya sa gisul-ob niyang polo shirt nga pula nga giparesan sa Levi’s nga maong. Bag-ong laba sab ang gisul-ob niyang rubber shoes nga Nike.

Have something to report? Tell us in text, photos or videos.

Ug humot kaayo siya sa gi-spray niyang perfume sa iyang lawas. Andam na siya pagpakig-atubang kang Gloria, ang gihalaran niya sa iyang gugma tulo ka buwan na.

Valentine’s Day karon. Malipayon kaayo siya. Karon ang gisaad ni Gloria nga iyang masayran ang tubag niini. Kabigot ra ba gyud sa lawas ni Gloria, morag wa matandog sa panahon. Biyuda si Gloria apan way anak. Managsama silag edad, kuwarenta.

Sa milabay nga gabii namisita siya kang Gloria, apan wa kaayo siya matagad niini kay misabat man kini sa pangadye sa namatay nilang silingan. Hinuon, nalubong na ang minatay kaganina. Dako nag panahon si Gloria sa pagtagad kaniya karong gabhiona.

“Ah, humota ni Art. Morag dunay date ni ron, da!”

Gikidhatan ni Art ang iyang amigo nga iyang naagian sa balkon niini. “Siyempre. Valentine’s ron!”

Didto sa balay ni Gloria...

“Di na lang kaha, Art, uy. Mga tiguwang na man ta.”

Naminghoy si Art sa gisulti ni Gloria dihang nag-atubangay na sila sa sala sa balay niini.

“Di matiguwang ang gugma, Glor. Sumala, hangtod karon wa ko magminyo kay ikaw ra gyud ang akong gimahal!” daw nagpakiluoy sang tingog ni Art.

Karibal ni Art sa gugma ang namatay nga bana ni Gloria. Bisag gipakyas siya niini nagpabilin ang iyang gugma ngadto sa babaye. Ug karon nga nabiyuda na kini, tinguha niya nga maangkon na ang gugma niini.

“Basta, pasensiya na lang gyud, Art.”

Niadtong tungora nagkalawom na ang gabii. Magul-anon nga mitindog si Art aron mopauli na lang dihang miuwang ang iro sa silingan. Naigking si Art dihang kalit nga mikabyon sa iyang liog si Gloria.

“A-Ayaw ko biyai, A-Art! Basig mibalik ang kalag sa among silingan. Mahadlok kog multo!”

Migakos paghugot si Gloria kang Art. Nakapahiyom si Art. Gigakos sab niyag hugot ang bigot nga lawas ni Gloria. Nagkurog sa kahadlok si Gloria. Gihagkan ni Art ang mga ngabil sa biyuda. Ug nabatyagan niya nga misamot kahugot ang paggakos niini kaniya.

Mibawos kini paghawok sa iyang mga ngabil.

Samtang sa gawas mihunong na sa pag-uwang ang iro. (KATAPUSAN)