Tambagi ko Noy Kulas: Pamilya o uyab?

Monday, February 13, 2012

DEAR Noy Kulas,

Ako si Popoy, nagtrabaho sa usa ka kompaniya dinhi sa dakbayan sa Sugbo. Akong suliran kabahin sa akong uyab ug akong pamilya. Sukad pa niadtong college pa mi sa akong uyab, akong pamilya, labina sa akong manghod nga babaye, wa makauyon niya kay lagi daw estrikatahon, hilumon, moestorya lang kuno kon madusmo.

Have something to report? Tell us in text, photos or videos.

Nakasabot man pud ko sa akong uyab nganong ingon ana siya. She lacks self confidence gud. Di kaayo siya mo-mingle sa mga tawo apan kon hatagan lang nimo og oras nga ila-ilahon siya, nindot baya siya og personality.

Karon nga kaming duha nakatrabaho na, nisamot ang akung problema. Laliman ka, di na gud ganahan akong uyab moadto sa balay kay akong manghod kusog kaayo motumay niya.

Nganlan siya og bisan unsang mga pulong nga maot. Sa una pa kaayo gaantos akong uyab sa pagtratar sa akong pamilya diha kaniya. Pirmi gud mi maglalis kay makapangutana man pud siya nganong wa koy gibuhat kay di man masulbad ang problema.

Gikapoy na siya. Makigbuwag na siya kon wa gihapon koy buhaton sa sitwasyon. Sa tinuod lang, Noy, lisod kaayo gud. Natunga ko. Di ko ganahan mopili nila. Importante nako mao ang akong girlfriend kay siyempre, gihigugma gud nako siya, apan di ko kabiya sa akong mama because she’s been a good mother to me. Akong manghod gisigehan na nako og badlung. Kuwang na lang dapatan. Gipabadlong na pud na nako ni Mama apan wa gihapoy epekto kay akong mama mahadlok modisiplina kay masakiton daw og kasingkasing akong manghud. Di siya pwede maguol og maayo kay maglisod og ginhawa. Mao nga di gyud makaon sa baboy ang batasan atong bataa.

Maluoy baya kong mama kay pareha nako, natunga pud siya. Apan bati pud kaayo kon pasagdaan lang nako nga ingon ani. I don’t want to lose my girlfriend and my family too. Tambagi ko kay galibog na gyud ko sa akong buhaton. Salamat sa imong oras ug more power diha kanimo.

POPOY

Popoy,

Una, pangutan-a ang imong kaugalingon. Kinsa may imong ikauban sa tibuok kinabuhi?

Kinsa man ang imong pakaslan? Kon wa makauyon ang ubang mga sakop sa imong pamilya, di ba diay mo makapuyo nga malinawon sa imong uyab kon magminyo na mo? Daghang mga magtiayon nga malinawon ug malipayong nagpuyo bisan kon di tanang mga sakop sa ilang pamilya nalipay sa union sa magtiayon.

Ang importante mao ang inyong pagminahalay ug ang inyong duha ka mga kalipay.

Dunay mga problema sa kinabuhi nga di angay sulbaron. Usa na niini mao ang inyong sitwasyon. Di man nimo mapugos ang imong igsuon nga mo-like siya sa imong uyab. Mao sab nga di siya makabuot kon kinsa ang imong higugmaon o bisan kinsa sa imong pamilya.

Sa gugma, sometimes you have to be selfish for your own happiness.

Ayaw na dad-a ang imong uyab sa inyoha. Kon magminyo mo, seguradoha nga di mo mopuyo
sa inyoha kay wa man kaha makauyon ang uban. Sa ako nang giingon, daghan ang ingon ani nga problemang nasugatan ang magtiayon but they still lived happily.

NOY KULAS