Sugilanon: Nakakumpisal si Ridor
-A A +ATuesday, February 28, 2012
Fredrick F. Gelbolingo
121 Prenza, Argao, Cebu
“DILI KO mangumpisal, Padre!” matod ni Ridor nga naglingkod sa ngilit sa iyang katre. Makaluluoy kaayong sud-ungon ang iyang pamayhon. Wangkig na siya. Mitaas ang liog; midako ang mata. Ang iyang mga pulong maoy iyang tubag sa Pari human kini nangatahuran kaniya ning buntaga. Si Padre Jumao, ang pari gihatod sa iyang lawak ni Mama Halin niya.
“Ngano man?” gikan ni Padre Jumao.
“Wa akoy sala, Padre,” ni Ridor.
“Nganong wa man ‘kay sala?” paundayon sa pari.
“Tungod kay tawo lang ako, Padre.”
“Nganong wa man kay sala, kon tawo lang ka?” sukot na sad sa pari aron makapagawas si
Ridor sa iyang gibati.
“Tungod kay di akong kabubut-on nga matawo ning kalibutana, Padre,” ni Ridor nga padayong mibutyag sa iyang punto.
“Kang kinsa man diayg kabubut-on?” sa pari nga nagtimaan sa mga tubag ni Ridor nga iyang nasabtan nga gikan gayud sa kinauyokan sa tawo.
“Sa Ginuo, Padre,” mitan-aw si Ridor sa nawong sa pari.
“Kaila diay ka sa Ginuo?” mitutok ang pari sa nawong ni Ridor.
“Kaila, Padre.”
“Kinsa man siya?”
“Ang Magbubuhat sa kalibutan ug sa tawo, Padre.”
“Unya, nalipay ka ba sa imong pagkatawo ning kalibutana?”
“Nalipay kaayo, Padre,” ni Ridor nga nagpahiyom.
“Nganong nalipay man ka nga natawo ning kalibutana?”
“Tungod kay nahimugso ko sa kuwartahang pamilya, Padre.”
“Unsa pa?” sa pari nga gibinhod nag binarog. Mitupad siya paglingkod sa katre ni Ridor.
“Natilawan ko ang tanang lami ning kalibutana, Padre.”
“Unsa mang mga butanga kini?”
“Lamiang pagkaon, sigarilyo, bino, babaye ug shabu. O, nganong nanguros ka man, Padre?”
“Dakong sala kanang imong gipanulti karon.”
“Sa gikaingon ko na, di kini akong sala, kay dili akong kabubut-on nga natawo ning kalibutana. Kon akoa pa unta, di ko mopuyo ning kalibutana nga puno sa mga tentasyon.”
“Kon di ka mokumpisal, masugba ka sa kalayo sa impyerno!”
“Kon pagbuot sa Ginuo, andam kong dawaton ang silot aron makabayad ko sa akong mga sala. Mo-dayb ko sa kalayo sa impyerno!”
Sa paggawas sa pari sa lawak, giataki si Ridor sa iyang sakit. Ug namatay. Misinggit ang iyang inahan, “Patay na siya, Padre!”
Miduol si Padre Jumao sa inahan ni Ridor ug mihunghong, “Nakakumpisal na siya, ug ang Diyos na ang igong mohukom kaniya.” (KATAPUSAN)
Gipatik sa mantalaang SuperBalita Cebu Pebrero 29, 2012.
Kalingawan
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
