Sugilanon: Duha sa kawad-on
-A A +ATuesday, March 13, 2012
Jun Cañizares
Talisay City, Cebu
Sa poste ang bombilya may gamayng trompa, nagtayhop ug malinging kahayag sa ubos.
Nagbinaklid si Polong, nagpaso-paso sa kahayag, usahay mosaylo ngadto sa kangitngit.
Mitungha si Betong. Tinatapakan ug karsones.
“May gihulat ka ning igang gabii, bay Polong?”
“Sulbad sa bug-at ug pait kawad-on. Maayo pag magpakamatay.” Nanglulho sa lubarong
kamisadentro. Upos na ang iyang goma nga sapatos.
“Hulat una, bay.” Nagpuk-ong si Betong sandig sa poste. Pareho silag pagkabutang.
Lapoy siya kay gikan nangarga tibuok adlaw og utanon sa Carbon.
Nawala si Polong sa kahayag. “Wa nay kapuslanan...”
“Ngari. Magsultianay ta.”
“May kantahan. Sa silangan. Nagpabuto pag rebentadOr. Nia na ta sa kasadpan.
Gikantalitahan pa kita sa kalibutan.” Mituyok si Polong sa sidsid sa kahayag.
Mitindog si Betong. Nagpatid-patid pagkuha sa paminhod. “Nia ta sa taliwala.”
“Sa problema.”
“Kon ayuhog isip bisan asa ta barog kita nia sa sentro sa kalibutan. Kana ang hustong pagbasa sa kompas. Kita ang magbuot asa sugod ug sukod - gikan nato. Nia sab ta sa taliwala sa kahayag karon.”
“Makaon ang giingon mong taliwala, bay? Makaon ang kahayag?”
“Matod sa mga makinaadmanon ang kahayag kalan-on sa tanom.”
Si Polong didto sa kangitngit mibaraw. “Tanom ba ta, bay Betong?”
“Nganong dili nato sulayan nga magbulad sa init. Bay Polong, hain ka na? Basta buhi
may paglaom.”
“Adto na ko,” singgit ni Polong sa halayo sa kangitngit. “Dili na ko!”
Gihikap ni Betong ang iyang ulo nga may kartiyo. May gibug-aton o tilaw ba diay ang
wala? Gisid-ing niya ang mga kamot ug tiil. Kini ang mga himan sa tanang himan.
Mihanggap og hangin alang sa baga. Gipaminaw ang kasingkasing.
Kusog nakasinggit si Betong. “Ako way kawad-on! Nia! Nia! Kompleto.”
Mibalik si Polong sa kahayag. “May nakit-an ka?”
“Ako way kawad-on. Ikaw way kawad-on, bay Polong. Tan-awa ang imong kaugalingon.”
Tagsa-tagsa gitudlo ni Betong ang mga parte sa lawas sa higala. Sa kadasig nahikapan pa ang ubos sa pus-on. “Kay lain kanunay ang atong gihunahuna, wa nato makita ang uban.”
Sa malingin nga kahayag nagtinutokay sila. Mikidlap ang ilang mga mata. Kahilakon sila sa ilang kabuang. Unya kakataw-unon. Ug sila nangatawa.
“May katawa sab ta, bay Betong!” matod ni Polong.
“Ug Angeling ug Aurora.”
Nakaluha sila sa padayong pangatawa ubos sa malinging kahayag. (Katapusan)
Gipatik sa mantalaang SuperBalita Cebu Marso 14, 2012.
Kalingawan
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
