Sugilanon: Ang Amahan

Henry Y. Mañus
179 Basak-Iba, Lapu-Lapu City

NAGPING-IT ang dagway ni Lisa samtang naghigda sa kama. Nia siya karon sulod sa delivery room sa maternity hospital. Hapit na siya manganak.

Sa gawas sa nag-alindasay si Fredo, bana ni Lisa. Naglibog siya kon unsay buhaton, ilabi na nga una pa lang kining pagpanganak sa iyang asawa.

Giharian siya karon sa kakulba ug kahinam. Gikan pa siya sa siyudad sa Sugbo ug mituyo gayud pagpauli dinhi sa probinsiya aron abagan ang iyang asawa ning iyang pagpanganak. Nagtrabaho siya sa siyudad ug panagsa rang mopauli gumikan sa kadako sa magastong pamasahe.

Samtang naglingkod siya sa taas nga lingkuranan nga nahimutang sa gawas sa delivery room, may nasigpatan siyang usa ka lalake nga paspas kaayong miduol sa siradong pultahan sa lawak. Nailhan niya kini.

“Kumusta ka na man, Bay Mar?” ni Fredo dayong tunol sa binukhad niyang palad kang Mar.

Suod niyang higala si Mar. Kanunay kini niyang ikauban ug ikainom sa ilang balay matag pauli niya gikan sa siyudad. Klasmet niya si Mar kaniadto gikan sa elementarya hangtod na sa hayiskol.

Nakalitan si Mar ug wala dayon makatingog dihang nakita niya si Fredo.

“Ma…maayo man, Bay Fred!” ni Mar nga midawat sa kamot ni Fredo. Naglamanohay sila.

“Nganong buot ka mang mosulod sa deli­very room, Bay Mar?

Naa ba sab sa sulod imong asawa?” sukna ni Fredo kinsa gibati og kahibulong ning pagbutho ni Mar.

Wala na makatubag si Mar kay kalit miabli ang pultahan sa delivery room ug migawas ang doktora nga maoy miatiman kang Lisa. Miduol dayon si Fredo.

“Kumusta na si Lisa, Doktora?” si Mar maoy unang nakapangutana.

“Normal ra ang iyang pagpanganak. Ug himsog nga batang lalake ang iyang gihimugso,” matod sa doktora nga mipahilayo sa duruha.

Milakaw usab dayon si Mar nga nagngisi ug wala gani manamilit kang Fredo. Gitan-aw siya ni Fredo.

Unya may nahinumdoman si Fredo samtang nagsud-ong kang Mar nga mipahilayo. Nahinumdom siya niadtong usa ka gabii kanus-a nag-inom sila si Mar sa sala sa ilang balay. Tungod sa tumang kahubog nahikatulog siya sa sopa. Sa iyang pagmata nianang pagka kaadlawon may naalinggatan siyang duha ka anino nga mitadlas sa kangitngit sa sulod sa ilang balay. Unya sa pagsiga sa sugang dagitabnon nakita niya si Lisa nga miduol sa iyang nahimutangan. Gibira siya ni Lisa ug giagak paingon sa sulod sa ilang lawak.

“Si Mar kadtong usa sa duha ka anino nga akong nakita. Salbahis!” naminti si Fredo, apan ang mga pulong didto lamang moulbo sa ilawom sa iyang dughan. (KATAPUSAN)