Serna: Daan pa gyud ko!
-A A +ANi Roger Serna
Kyaw-kyaw
Thursday, May 24, 2012
DAKONG kalihukan sa natad sa kultura ug heritage (unsa bay Binisaya ani uy?) ang mahitabo sugod sa alas 6 s.g. ngadto sa alas 12 s.t.g. (sa tungang gabii na, ayaw pagbuot, hehe!) karong adlawa.
Kini mao ang Gabii sa Kabilin diin mga 22 ka mga lugar nga may kalabot sa atong kagahapon ug kagikan ang mahimong bisitahan sa kantidad nga P150 lang.
Moapil ko ani. Taudtaud nang wa ko makihigayon. Kitakits na lang didto sa mga museum ug uban pa.
***
Daan pa gyud ko! Wa gyud ko masayop! Di lagi gyud kadaug si Jessica Sanchez. Bisan pag klaro kaayo nga siya ang mas maayo (labing maayo pa gani) nga mokanta.
Motugot ba god nang mga puti nga ma-backstage ang ilang kadugo? Kana ang mapait nga kamatuoran nga ato na lang tunlon kay wa tay mahims.
Sa laing bahin, duna say miingon nga patigayon baya nang American Idol mao nga kinahanglang si Phillip Phillips gyud ang modaug aron makahimo kinig album ug may mamalit kay klaro na man gyud nga himoan og album si Jessica bisan pag runner-up ra kini.
Sa ingon, doble ang kita-on kay sa kon mabali ang sitwasyon. May punto sab. Sige atong huwaton kinsay mas mosikat, kinsay mas daghang halin sa albums.
***
Seguradong daghan sab tingali ang naguol sa pagpanaw sa mga idolo sa musika nga sila si Donna Summer ug Robin Gibb sa grupong Bee Gees. Di tingali ang mga batan-on nga wa gani tingali kadungog sa ilang awit o makaila ba hinoon nila pero alang niadtong nagtikawtikaw na sa dekada 80, dakong tampo sa kamabulokon sa ilang kinabuhi ang mga awit sa duha.
Pahulay sa dayon, Donna ug Robin. Haha! Feeling close ba?
***
Alang natong mga Pinoy, daku gyud ang kahulogan niining pagsaulog sa pista. Di lang kini panahon pagpasalamat sa Ginoo pinaagi sa patron sa mga grasyang nadawat, higayon usab kini nga magkapundok ang mga magparente ug managhigala ug makabaton ug dugang pang higala.
Niadtong miaging semana, nibalibad na lang gyud ko sa imbitasyon ni Ms. Rosemarie Gaisano nga mokuyog sa Bogo nila ni Joem Bascon ug Melissa Ricks kay pista sa barangay Daanlungsod, Oslob diin daghan kog mga parente ug higala sama nila ni Kapitan Ronnie Rendon ug sa iyang mga igsoon nga si Nitoy, Bebie, Margarita ug sa mga anak ni Ganing (Fel, Ryan, Ludavil, Lorna ug Malu).
Mga higala sama nila ni Boyboy ug Gingging Luna, Olympia Fajardo, Konsehal Dodong Rendon, Nitoy Culanag (diin ka adtong higayona?) ug daghan pa. Nakaila pa gyud nako ang taga Red Petron nga sila si G. ug Gng. Elma Doroon, Rowena Vergara, Corazon Buscato, Grace, Jheff ug James Harvey.
Kitakits usab bisag di pista. Anà.
***
Bilib ko sa Star Cinema uy! Bag-o pa gani nikitag dako sa takilya ang Every Breath You Take nila ni Piolo Pascual ug Angelica Panganiban, gisundan sab dayon sa Born To Love You diin sila si Coco Martin ug Angeline Quinto sab ang mga bida.
Morag daghan ang nag-atang niini kay sikat baya kaayo karon si Coco ug gusto sab sila makakita kon unsay ikabuga ni Angeline sa pag-arte. Karong Miyerkules na, Mayo 30, kini isalida. Nag-atang sab mo?
***
Unsa nay resulta sa rali-rali batok ni Lady Gaga? Daghan hinoon ang nitan-aw. Ngano bitaw?
Nalingaw ko adtong wa pasudla kay nagsul-ob og costume nga hinimo sa kahoy. Diyes mil pesos baya kunoy balor adto. Ang ending? Gihubo na lang niya aron makasulod.
Duna say gustong motan-aw ni Supreme Court Chief Justice Renato Corona adtong pagtunga niya sa Senado unya wa gihapon pasudla kay may gisul-ob sa likod nga korona sa patay.
Haha! Pastilan! Lain-laing tawo, lahi-lahi ang gimik. Mao nay nakapaalegre sa kalibutan.
Gipatik sa mantalaang SuperBalita Cebu Mayo 25, 2012.
Kalingawan
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
