Sugilanon: Kasina

Henry Y. Mañus
Basak-Iba, Lapu-Lapu City

“DALI na ngari sa kusina, Day Lina!” sangpit ni Ricky sa iyang asawa. Kaganina pa niyang gitawag si Lina kay gusto niyang magdungan silag pangaon sa ilang paniudto.

Apan wala gihapon motubag si Lina, busa migawas siya sa kusina ug gipangita ang asawa.

Ug nakita niya kini nga nag-akbo sa bintana sa ilang sala.

“Tan-awa ra god sila Ramon, Dong Ricky,” matod ni Lina dayong tudlo sa balay sa magtiayong Ramon-Nita nga nahimutang sa atbang sa ilang balay. “Nagpahatod na sab silag refrigerator. Halos adlaw-adlaw nagpalit silag mga aplayanses, ug napanindot pa gyud nila ilang balay. Apan kita, hahayyy!”

Daw gihiwa og mahait nga punyal ang dughan ni Ricky human mabati ang gipamulong sa iyang asawa. Nakapanghupaw siya. Nakapanglingo-lingo. Sa hilom gibati sab siya og kasina kang Ramon. Taksi drayber lang si Ramon, apan kusog ang pag-umento sa ilang pagpuyo. Samtang siya nga usa ka superbisor sa dakong kompaniya nga nahimutang sa Mactan Economic Zone, walay asenso ug nagapos pa sa mga utang.

“Sagdi lang, Day Lina, kay basin sa umaabot nga mga adlaw kita na sab ang moasenso,” ni Ricky.

“Asenso?” kalit nga mibarog si Lina. “Kanus-a pa ta moasenso? Unya na bag matigulang na ta? Maayo ka man ganing biyaan!” Taas ang tuno sa tingog ni Lina nga misulod sa ilang lawak.

Gitutokan ni Ricky ang likod ni Lina. Ning higayuna, daw miulbo ang dughan ni Ricky sa kapungot. Napungot siya sa ilang kahimtang ug sa kinaiya sa iyang asawa nga usa ka masinahon.

Gabii. Sa paghiuli ni Ricky sa ilang balay gikan sa trabaho gisugat siya sa tumang
kamingaw. Gikulbaan siya. Gilibot niya ang tibuok balay, apan wala niya makit-i si Lina. Mibalik siya sa sala ug milingkod sa sopa. May nasigpatan siya. Usa ka papel nga gibutang diha ibabaw sa telebisyon. Mibarog siya ug gikuha kini. Sulat ni Lina nga nagkanayon nga molakaw si Lina sa layong dapit aron pangitaon ang maayong kapalaran.

Mingaab diha-diha si Ricky ug midanguyngoy.

“Dong, Dong Ricky, naunsa ka?” Dihay mga bukton nga miyugyog sa lawas ni Ricky. Unya mibuka ang iyang mga mata ug nasawod sa iyang panan-aw ang dagway ni Lina nga nadan-agan sa puting kahayag sa sugang dagitabnon.

“N-Nagdamgo ko, Day Lina,” ni Ricky nga migakos sa iyang asawa. “Abi nakog tinuod nga gibiyaan ko nimo!”

“Ha-ha-ha!” mibahakhak pagkatawa si Lina. “Nganong biyaan god tika nga kabuotan nimo?

Tarong ka god nga pagka tawo. Di ka sama kang Ramon nga usa diay ka tulisan.”

“Ha? Tulisan si Ramon, Day Lina?”

“Oo, uy! Gidakop siya sa mga pulis kaganina kay miunay pagtulis sa iyang pasahero, samtang didto ka pa sa kompaniya nga imong gitrabahoan.

Makauulaw kaayo, Dong, kay daghan sa atong mga silingan ang nakakita kaniya nga gipusasan,” asoy ni Lina nga mihalok sa mga ngabil ni Ricky.(KATAPUSAN)