Vallena: World Naked Bike Day

SAMTANG kadaghanan sa katawhan sa nagkadaiyang mga suok sa kalibutan nga mahiligon og boxing gilansang atubangan sa ilang mga telebisyon aron pagtanaw sa away nila ni Manny Pacquiao ug Timothy Bradley niadtong miaging Dominggo, pipila sab ka mga cycling advocate sa nagkadaiyang mga nasod sa Europe ug Estados Unidos mingsaulog sa World Naked Bike Day.

Naked as in naghubo gyud sila sa tanang sapot samtang nagbiseklita sa dagkong mga karsada sa ilang mga dapit. Ang uban duna lay gamay nga mga sampong nga nahabilin sa ilang mga lawas. Nakakita ko sa nagkadaiyang mga hulagway sa Yahoo. Mga babaye ug lalake ang nangapil. Nindot sab kaayo pagkakuha ang mga hulagway kay way nakitang pribado kaayong bahin sa lawas, gawas lang sa mga sampot.

Tumong sa ilang gihimo mao ang paghangyo sa mga motorista nga respetuhan ang mga magbiseklita sa karsada, hatagan og kaagian, di babagan sa mga driver diha sa karsada ug pagduso sa biseklita isip green transportation. Wa may ibuga gud nga aso ang biseklita kay humanpowered man ni.

Ang mga environmental advocate nagduso na gani niini. No wonder, sa among mga kalihukan, dunay mga higayon nga dapiton mi sa pipila ka civil society groups, sama sa Movement for a Liveable Cebu, sa ilang mga kalihukan. Kon maghisgot ka og biseklita, maghisgot ka usab og liveability sa usa ka dapit.

Road sharing

Niadtong Martes, dunay pipila ka mga karsada sa Brgy. Lahug nga ang usa ka bahin gisirhan aron kaagian sa mga tawo nga manglakaw ug magbiseklita. Sama sa nangaging mga kalihukan nga gipahigayon sa Road Revolution, gisaway sab kini sa mga motorista. Kay alang kanila nakalangay kini kay nakamugna kuno og kahuot sa traffic.

Samtang balido ang ilang mga argumento, ang kalihukan sa Brgy. Lahug maayo og katuyoan ingon man long term effect. Naandan lang gyud na sa mga tawo nga mo sa mga kausaban. Bisan gani sulod sa usa ka kompaniya, kon dunay bagong mga policy nga ipatuman, moresist ang ubang mga kawani. Apan kon magsige na ang pagpatuman, makaton ra sa pagadjust.

Ang gihimo karon sa nagkadaiyang mga grupo nga nagadvocate alang sa paghatag og usa ka bahin sa karsada sa mga tawo nga maglakaw ug magbiseklita di lang alang sa henerasyon karon, kon di sa umaabot.
Di man kinahanglan nga tibuok lane ang igahin, kon di usa ka bahin sa karsada nga igong malakwan ug mabiseklitahan nga luwas.

Kay kon imong tanawon ang atoang mga sidewalk, kasagaran niini dunay mga naninda samtang ang uban gihimong tipik sa mga establisemento sa negusyo. Ari na ang mga tawo manglakaw sa karsada. Mao ni ang nakakuyaw sa kahimtang sa atoang mga dalan. Dinhi, ang road sharing maoy maayong alternatibo. Di man sab tanang mga karsada ang butangan niini.

Turismo

Naguol ang mga opisyal sa Sugbo kay kita ikatulo na lang nga tourist destination sa nasod. Naguna na ang Camarines Sur (Camsur) ug ikaduha ang Metro Manila. Ang kadaghan sa maanindot nga mga dapit sa Camarines Sur, labina sa water sports, maoy nakapadani sa mga turista. Niadtong 2008 gipahigayon didto ang World Wakeboard.

Unsaon, kon tanawon nimo ang Sugbo, miapas na kini sa mga sakit sa Manila. Grabe ang urbanization, nagyagaw ang mga karsada ug naghuot ang mga balay. Kon way maayong garbage disposal ug uban pa, in the near future, ang kahugaw sa Mactan Channel hayan moabot sa mga beach sa LapuLapu.

Suwayi sa pagsikad sikad libot sa mga urban center sa Metro Cebu, mabalaka ka sa imong makita. Gubot pa sa lukot.