Kon ikaw pahukmon: Labaw pa sa hayop

NIADTONG 1991, dihang si Loida 3-anyos pa, gisugdan na siya sa pagmolestya sa iyang amahan matag higayon nga ang iyang inahan motrabaho. Kanunay siyang mohilak kon duwaan sa iyang amahan ang iyang pribadong bahin sa lawas.

Wa gyud mosulti si Loida sa gihimo sa iyang amahan kay nagtuo lang siya nga nagduwa-duwa lang sila.

Niadtong 1994, dihang nagpanuigon na og 6-anyos si Loida, gihilabtan na gyud siya sa iyang amahan. Kon motrabaho na ang iyang inahan, pakatulgon sa ilang amahan ang iyang mga igsuon. Manira dayon kini sa bentana ug pultahan. Dinhi, gibuong gyud sa iyang amahan ang linghod pa kaayo niyang lawas.

Igo ra siyang mohilak sa kasakit ug wa gyud mosumbong sa iyang mapait nga kasinatian kay wa siya makahibawo nga ang gihimo sa iyang amahan usa diay ka krimen. Kanunay kining gihimo sa iyang amahan kaniya. Diha ra siya mahibawo nga ang gibuhat sa iyang amahan usa diay ka krimen dihang nag-edad na siya og 12-anyos.

Niadtong 1999, grabe ang dugo ni Loida nga nilanat og daghang mga adlaw. Ning higayuna nisumbong siya sa iyang inahan nga siya gilugos na makadaghan sa iyang amahan.

Gikomprontase sa iyang inahan ang iyang amahan apan wa pasakai og kaso.

Ang katapusan nilang panaghilawas nahitabo niadtong Abril 3, 2001. Human siya hilabti, nihigda tupad kaniya ang iyang amahan sa lantay. Didto, naabtan sila sa iyang inahan.

Gikomprontase sa iyang inahan ang ilang amahan ug nahitabo ang kadiyot nga panaglalis.

Nisumbong siya sa linuog nga binuhatan sa iyang amahan.

Samtang si Lorna, iyang maguwang, niasoy nga gisugdan siya sa pag-abuso sa iyang amahan dihang siya 8-anyos pa. Matag higayon nga siya ug ang iyang amahan mao lay mahabilin sa balay, manirado kini ug hilabtan siya.

Niadtong Oktubre 2000, gitawag siya sa iyang amahan ug gimandoan sa pagsirado sa tanang mga bentana ug pultahan. Gimandoan siya sa paghigda sa lantay.

Nausban pa kini. Dihang nakadungog si Lorna sa giasoy ni Loida ngadto sa ilang inahan, nitug-an usab siya sa iyang mapait nga kasinatian. Tungod niini, niadto silang tulo sa boss sa ilang amahan aron mangayo og tambag. Gikuyogan sila niini ngadto sa kapulisan.

Samtang sa korte, ang ilang amahan nanghimakak sa pasangil batok kaniya. Matod niya nga gibutangbutangan siya og sala tungod sa kasuko kaniya sa iyang asawa sa iyang pagpamabaye. Ikaduha, namasangil si Loida kaniya tungod kay kanunay kini niyang
madapatan isip tipik sa iyang pagdisiplina sa iyang anak.

Motuo ka sa alibay sa amahan? Kon siya sad-an, unsa man nga tukma nga silot ang ipahamtang kaniya, kana kon ikaw ang pahukmon?