Tambagi ko Noy Kulas: Nausab

DEAR Noy Kulas,

Tagoa lang ko sa ngan nga Rex, taga Lapu-Lapu City. Ang akong problema mao ang akong asawa nga usa ka nurse. Duna miy usa ka anak.

Sukad nagkauyab ug naminyo mi sa akong asawa, maayo man kaayo ang among relasyon. Buotan kaayo siya ug mapinanggaon nga asawa ug inahan sa among anak. Apan mausab gyud diay ang tawo. Nagsugod ni dihang gikuha siya nga freelance nurse sa pipila ka mga kompaniya, labina sa call centers. Nakabarkada siya og sama niya mga nurse pud apan mas batan-on.

Nagduda ko nga duna siyay laing karelasyon nga lalake. Nasakpan man gud nako nga duha na diay ang iyang cell phone dihang nahilngan nako ang iyang bag kay duna koy gipangita nga document. Ako siyang gi-confront ini. Ni-explain siya nga ang cell phone gikan sa usa ka company nga nahimo na niyang regular nga client. Ako siyang gipangutana nganong wa siya mosulti nako nga unta iya kong bana. Ingon niya nga wa na kinahanglana kay di man iyaha ang cell phone.

Kay freelance lagi, di magpareho ang oras niya sa lakaw. Dunay time nga molakaw siya og lawom na nga gabii kay gitawgan siya. Wa koy mahimo kay trabaho ug income namo na.

Pero naay time nga until morning na siya ug kapoy na kaayo siya. Makatulog na diretso ug wa nay time nako ug sa among anak. Makabantay ko nga motago-tago na siya og text kay dunay mga time nga iyang dad-on ang cell phone sa banyo ug ipang delete ang messages. Nausab na siya sa among sex life. Unsa man ang akong buhaton, Noy Kulas?

Naglibog na ko.

REX

Rex,

Pag-estorya mo sa imong asawa. Tell her nga duna nay mga kausaban sa inyong pagpuyo nga wa na nimo mauyoni. Tinuod nakakuwarta mo apan ang time usab sa imong asawa nausab na. Wa na kaayo siyay time ninyong duha sa inyong anak. Unsa man ang inyoha, kuwarta o oras nga maayo sa inyong pamilya. Mag-unsa man ang kuwarta kon ang pamilya mabungkag ra sab kay gikaon na ang oras sa pagsige og panguwarta. Kinahanglan gyud nga balance, naa ang oras, naa sab ang kuwarta. After all, nanguwarta alang sa pamilya.

Inyong estoryahan kon makaayo ba sa inyong pamilya kanang matanga sa iyang trabaho. Di ba kaha mas maayo nga mag-regular nurse siya sa ospital o kompaniya kay sa nianang freelance siya nga way klarong schedule. Estoryahan sab ninyo ang inyong finances nga mausab gyud kon iya ning buhaton.

Kanang imong mga pagduda possible sab nga tinuod, possible sab nga nasayop ka lang.

Kay ang iyang trabaho karon mas stressful kay sa regular nga nurse kay erratic ang iyang schedule, labina kon call center na ang motawag niya. Makaapekto ang stress sa sex life. Kinsa may ganahan og sex kon lapoy ang imong lawas? Basin kanang imong naob­serbahan sa iyang behavioral change bunga lang sa imong imahinasyon tungod usab sa imong pagduda nga naa siyay kabit.

Timan-i, naay giingon nga you can’t have the best of both worlds. Duna gyuy makuhaan ug dunay madugangan. Mas maayong balance lang. Busa, pag-estorya ug pagplano mo. Best of all, mag-ampo mo as family aron mas lig-on mo sa trials nga moabot.

NOY KULAS