Talk to Papa Joe: Nahigugma sa amo

DEAR Papa Joe,

Tawga lang ko sa ngalan nga Beth , 19, taga Negros ug naa diri sa Cebu. Nisud ko isip katabang. Napugos ko og sulod ning trabahua tungod sa kalisod human nataktak akong amahan sa iyang trabaho. 3rd year high school lang ko mao nga dili gyud ko kakita og taas taas nga trabaho. Daghan nagsulti nga sayang kay mestiza daw ko. Usahay magkatawa gani ko kay maa-an pa ko nga amo kay sa akong amo.

Tungod niini, diri nagsugod akong suliran kay kining akong amo nag-isura lang ni siya sa pagsugod nako og trabaho hangtod nga niuli iyang bana. Wa ko mag-expect nga ingon ato pa diay ka bata tan-awon iyang bana. Sa sinugdanan, mauwaw ko pero maayo man diay og batasan ang amo nako nga lalake. Mao to nagkasuod mi, labi na molakaw ang iyang asawa kay negusyante.

Hangtod sa niabot sa punto nga naa nay nahitabo namo ug nagsige na lang gani. Dili sad ko mamabdos kay iya man ko gihatagan og pills ug naa sad koy allowance niya. Pero kon naa mi sa atubangan sa iyang asawa, buotan kaayo mi. Halos di man gani mi magduol mao nga wala gyud makaduda iyang asawa namo. Pero ako maoy naay problema ron kay nahigugma na kaayo ko sa iyang bana. Nagplano na gani mi nga mag taban kay siya sad nahigugma nako. Usa pa dili na daw siya mouli sa ila sunod kanaug niya sa barko. Palihug tambagi ko.

BETH

Beth,

Kaluy-i imong kaugalingon. Ayaw buhatang instrumento sa sala kay luoy sad ang amo nimong babaye. What if kon ikaw pa to, ganahan ka ilugon imong minahal? Di baya sad lalim mawala iyang bana. Di pa gani sila magkakuyog permi, mawala gyud sa dayon. Dili sad baya garantisado nga magkakamo gyud. Siguro nadala lang siya sa ka mestiza nimo unya bata pa gyud. What if matiguwang naka? Naa pa kaha na siya diha nimo? Nga iya ganing asawa nahimo pa niya nga binua­ngan sa atubangan, ikaw pa kaha?

Ug usa pa, madawat sad kaha sa imong mga ginikanan nga mahug ka og kabit? Andam ba sad ka itago lang niya para lang madayon ang inyong gibati? Di ba ka mahadlok og gaba? Wa kabay kahadlok sa Ginuo? Kana maoy hunahunaa day samtang wala pay resulta nang gibuhat ninyo. Ako pa nimo mohawa na ka diha kay dili maayo ang imong gisudlan. Kana lang ug daghang salamat.

PAPA JOE

(sa inyong tampo ipadala lang sa papajoelon@hotmail.ph o joelonrt@hotmail.com)