Sugilanon: Ang pamilya ni Papa Cesar

Ma. Ana Mendoza
Argao, Cebu

KALIT nitiurok si Imelda sa iyang nahimutangan dihang maoy misugat sa iyang panan-aw ang iyang amahan nga nag-agbay sa batan-ong babaye paingon sa sulod sa usa ka mall sa may Colon.

Dali-dali niya kining giagpas aron pagsusi kon wa ba kaha siya masayop sa iyang nakita. Malipayon nga giagbayan sa iyang Papa Cesar ang maong babaye.

“Kon wa ako masayop, katalirungan ra ni nako ang iyang pangedaron,” mikibot ang mga ngabil ni Imelda kalabot sa kuyog sa iyang amahan..

Sa sigeng pagsunod-sunod ni Imelda sa iyang papa ug sa kuyog niini, wa niya damha nga nahiabot diay siya sa foodcourt sa maong establisemento. Gibati niya ang tumang kalagot sa iyang nakita. Gikulbaan usab siya kon unsa pa kaha ang iyang masaksihan sa padayon niyang pagpaniid.

“Seguro kabit gyud kini sa akong way puangod nga amahan! Gihimo gani ni Mama Tasing ang pagpanarbaho sa laing nasod aron siya matabangan sa among panginahanglanon, unya mao kini iyang gibuhat?” ni Imelda sa iyang hunahuna..

Duha ka tuig ang kontrata ni Mama Tasing sa Middle East isip domestic helper. Bugtong nga anak si Imelda. Sukad sa pagkabata niya, bugtong iyang inahan lang ang halos kuyog niya matag adlaw sa ilang pinuy-anan. Sa iyang nahibaw-an sa iyang Mama kaniadto, kanunay mobiyahe sa laing dapit ang iyang Papa aron sa pagpamaligya og mga sapatos ug mga sinina. Gani sa iyang nahinumdoman dihang nagtungha na siya sa elementarya hangtod hayskol, bugtong ang presensiya ra sa iyang inahan ang kanunay nisuporta kaniya.

Samtang nagtan-aw siya sa iyang Papa nga naghapyod-hapyod sa buhok sa batan-ng babaye, gibati niya ang tumang kasina. Bisan makausa wa kini mabuhat sa iyang Papa ngadto kaniya. Gusto niyang duolon kini aron pakauwawan. Kaluoy na hinuon ang iyang gibati ngadto sa iyang inahan nga tua sa layo.

Padayong gipanid-an ni Imelda ang babaye ug ang iyang amahan. Unya may hamtong nga babaye ang miduol kanila. Dala niini ang mga pagkaon nga gisulod sa tray ug gipahimutang tagsa-tagsa sa lamesang ilang nahimutangan. Dungan nga mibarog si Papa Cesar ug ang dalagita nga mihalok sa aping sa hamtong nga babaye. Misamot ang kahibulong nga nitumaw sa hunahuna ni Imelda.

“Di ba kaha lain kini nga pamilya ni Papa Cesar?” nakasukot siya sa hilom. “Ug kanang hamtong nga babaye nga daw kaparehas og edad ni Mama Tasing maoy iyang kabit ug anak na nila ang batan-ong babaye?” misantop kini sa hunahuna ni Imelda.

Tungod kay wa na niya maagwanta ang gibati niyang kalagot, kalit nga giduol ni Imelda ang iyang amahan.

“Pa, kinsa kini silang akong nakita karon? Nganong gibuhat mo man kini kang Mama? Wa ka ba masayod nga nag-antos gani siyang mahilayo kanato aron matuman ang atong mga damgo?” matod ni Imelda nga namula ang nawong sa kalagot.

Nahikurat ang tanan diha sa palibot sa kalit nga pagbutho ni Imelda. Gawas sa iyang amahan nakalitan usab ang mga kuyog niini. Natingala. Mibarog ang hamtong nga babaye nga grabe ang pagkusmod sa panagway nga mitutok kang Imelda. Ang batan-ong babaye nga diha duol sa gitindugan ni Imelda mihilak. .

Kalit siyang gibira sa iyang amahan paingon sa daplin. Didto seryuso silang nag- estoryahay. Gipasabot siya sa iyang amahan sa tanan tali kanila ni Mama Tasing.

“Kana silang imong nakita mao ang tinuod kong pamilya, Imelda,” matod sa iyang Papa.

Ang imong Mama nahimo kong hinigugma dihang nahimamat ko siya sa usa ka bar. Pasayloa ko nga wa sab ako makasulti kanimo bahin niini.”

Walay kasayuran si Imelda sa tanang panghitabo, kay mismo ang iyang inahan ug apuhan wa mosugilon niini ngadto kaniya.

Gibati ni Imelda ang kauwaw ug kaluoy sa iyang kaugalingon. Miduol siya pagbalik sa tinuod nga pamilya ni Papa Cesar niya ug nangayog pa­saylo sa nabuhat ni Mama Tasing niya ngadto kanila. (KATAPUSAN)