Tambagi ko Noy Kulas: Escort girl

DEAR Noy Kulas,

Saleslady ko sa dakong mall sa Cebu unya naay ni offer nako og $700 per night or $2,500 for 1 week. Naa koy mga kauban sa trabaho nga ang uban mga minyo nga nadala sa offer ug nahuman na. In fact ang uban nila maoy ni encourage nako ug maoy ni offer sa akoa in behalf atong batan-on nga Pinoy nga naa na sa America nag puyo. Dili siya DOM, gwapo gani ug buotan sad daw. Ingun sa mga nakasuway na nga gentleman ug maayo pud daw kaayo siya. Kita ko sa mga pictures nila nga gidala sila sa mga lugar sama sa Boracay ug mga 5 star hotel. Gi-date ug gialagaan daw silag maayo even after daw sa nahitabo.

Ingun nila nga uli daw atong lakiha kay naa silay pasalubong or cash bisan wa nay interest nila tong lalake. Natintal ko kay dako kaayo og matabang ang kwarta labi na sa akong pamilya sa probinsya nga napuno og utang. Ga duha-duha pud ko kay naa koy uyab apan virgin pa ko unya ang makauna nako dili tungod sa gugma kun di kwarta. Pero ang mga minyo gani nisugot ang uban, ang bana nga nakahibawo apan okay ra kay lagi practical na lang ta ba.

Tambagi ko, Noy, kay next week na lang kutob ang offer. Basin magbasol ko if di nako dawaton or magbasol pud ko kon akong dawaton.

THISH

TRISH,

Kon imo nang buhaton, unsa may imong kalainan nianang mga prostitute? Wa. Ang nakalahi ra gyud nimo mao ang ilang presyo. Pait no, kay karong panahuna grabe na kaayo ka material ang mga tawo. Ibaligya na lang ang pagkatawo ug kalag ngadto sa yawa tu­ngod lang sa kuwarta. Kay wa gyuy nakita nga sulbad sa suliran, ang pagpanguwarta nga dali ra kaayo.

Unya unsa man say imong itubag ngadto sa imong boyfriend kon mangutana siya nganong di ka na birhen. Mamakak na sab ka? Pananglitan maminyo mo unya dunay makasulti kaniya nga imong gibaligya ang imong pagkababaye tungod sa kuwarta, di kaha siya masuko ug biyaan ka? Kay laliman ka, matawag gud ka nga boring tungod gibaligya mo ang imong pagkababaye.

Ikatulo, unsa man kahay mahitabo kon maeskandalo, mamahimong mabaniog ang gibuhat nianang Pinoy nga batan-on diha ninyo. Labina kon mangabot na sa Facebook. Haskang uwawa kaha no kon maapil ka sa mga babaye nga nahimo niyang escort unya gika-sex bugti sa kuwarta. Kanang kauwaw di gyud na kabayran og kuwarta, Trish.

Mao na nga huna-hunaa og maayo. Tinuod makabayad mo sa mga utang. Human ini, unsa man? Mahurot ang kuwarta ug mangutang na sab. And the cycle goes on and on. Way kasulbaran ug way kinutuban ang problema. Mas maayo pa nang uban nga nangita og bana nga foreigner, nagtinarong sa relasyon ug nagmalipayon at the same time, natabangan sila sa ilang suliran nga pinansyal. Pragmatic but wa gi-compromise ang ilang pagkatawo.

Kanang ilaha sa imong mga kauban mao nay duwa sa yawa.

NOY KULAS