Talk to Papa Joe: Depressed

DEAR Noy Kulas,

Good day nimo. Itago lang ko sa ngan nga Nirelle. Ako ang type of person nga maglomlom og problema and di ko tighisgot sa mga tawo about ani. Pero recently, di na nako madala ang akong problema. So, naka-decide ko nga magpatambag nimo. nagsugod ni sa akong pamilya.

Akong pamilya man gud ang type nga di kamao unsaon og pakita sa ilang love. Kada lihok nako, bisag unsa pa man ni, ilang buhatong dakong problema. Pero if akong mga igsuon na gani, ilang i-encourage ug sultihan nga okay ra basta di na usbon. Akong mga igsuon achievers man gud.

Mga brayt sila kay nako. Ako man silang sabton nga maong grabe sila makakasaba nako tungod sa ilang gihuna-huna nga makamaayo nako pero dili gyud malikayan nga maka-feel ko og favoritism nila. Tawgon gud ko nila og bugo, slow learner ug bisan gani ‘bigaon’.

Kining pagtawag nila og bigaon nako kay tungod ni sa akong pag-eskwela. Di sa paghinambog daghan ang nanguyab nako ug tungod sa kahadlok, wa koy gi-entertain nila.

Nagtarong ko sa akong pag-eskwela pero unsaon ta man nga bisag unsaon nako og paningkamot, di man ko masulod sa top sa klase. If gagmay ko og grado kasab-an ko. If dagko man gani, ingnan ko nga ‘okay’ pero obvious nga wa sila nalipay. Sakit kaayo para nako. Sa eskwelahan pa gyud, naay daghan nga naglagot kanako kay usa nga lalakeng classmate nako nga naay uyab naibog nako ug bisan wala ni nako gi-entertain, iyang uyab nga pagkaselosa lagot kaayo nako ug nigawas nga akong ig-agaw ang lalake. Ang mga tawo man sad, bisag mo-explain ko kay di ko paminawon.Pirmi ko i-bully sa school.

Pirmi ko matawag sa office kay masulod ko og away kay pirmi kong initan. Bisan unsaon nako nga di mopalag, kay napuno sad tawn ko.

Niabot sa puntong na-depress ko. Maglaslas ko, nagsige ko og suway sa pagpakamatay.

Moinom ko og daghang tambal pero wa ko biyai sa Ginuo. Wala ko naunsa ug nagsige na lang ko og kapit Niya. Karon, naglisod among pamilya sa kwarta ug mobalhin unta ko og skwelahan, di madayon ug antuson na lang ni nako. Ako na giesturyahan akong pamilya sa akong problema pero ilang giingon kay wa silay mabuhat ug antuson na lang daw. Akong ipatambag karon kay unsaon man ni nako nga di naman nako kaya ang eskwela. Mahadlok ko og basin unsa akong mabuhat sa akong kaugalingon. Di ko ganahan makasala. Unsaon man ni nako? Kabalo ko nga dapat magpadayon lang ko og ampo pero usahay kay kailangan na man nako og tabang. Usahay di na madala og ampo. Unsa naman akong buhaton?

NIRELLE

Nirelle,

Karong panahuna daghan tinuod ang naglisod. Bisan gani kami naglisod man sab. Apan kon magpadala gud ta sa kalisdanan, malubong gyud ta sa kalisod. Kon unsa may adjustment, sama sa pagbalhin og school, balhin. Kahibawo ka, di lang na sa school apan sa estudyante. Ako produkto lang sa usa ka mababang paaralan apan nagkugi aron makahuman. Naa koy amigo kaayo nga utro sab, grabe ka kabus kaniadto, pero karon multi-millionaire na. Giusap ang kalisod aron moarang arang ang kinabuhi.

Ayaw pag-undang sa pag-ampo. Ask sa Ginuo og enlightenment ug strength. Ayaw paminaw sa negative nga mga tawo. Pasagdi ang comment sa imong pamilya kanimo. Kahibawo ka, di man na daugon sa achievement sa eskwelahan, kon di sa achievement human sa eskwelahan.

Kadaghan dihang ordinaryo og pangutok apan nahimo silang adunahan ug maayo og disposition sa kinabuhi. Sila nga gipakaubos kaniadto, gitahod na karon. So, wagtanga ang negative thoughts. Samot nang di sulusyon ang pagpakamatay. Di baya atoa ang kinabuhi. Iyaha ni sa Ginuo. Wa tay katungod nga mokutlo niini.

NOY KULAS