Sugilanon: Anak sa ungo

Rodel C. Nuñeza
Maslog, Tabogon, Cebu

SUKAD lang mikatap ang mga estorya sa ilang dapit ug hangtod na sa kasikbit nga mga barangay, nga ang mga ginikanan kuno ni Melba mga ungo, wala na gayuy nangahas pagpamisita sa dalaga aron pagpadayag sa ilang gibati. Miislag na sila pagkadungog nila sa maong estorya.

Nabalaka man sila nga basin og gipatakdan na si Melba sa iyang mga ginikanan pagka ungo. Sumala pa sa pagya, “Wakwak si Tatay mo, wakwak si Nanay mo, ug kay ikaw anak man, wakwak kamong tanan.”

Wala hinuon mahibaw-i kon kinsay nagsugod sa pagpakatap sa maong estorya. Dali ra kaayo kining mikatap ug gisawo-sawo sa katawhan, ilabi na niadtong nakaila kang Melba.

Tungod sa maong estorya kadtong mga lalake nga kanunay mamisita sa ilang Melba wala na mamalik pa. Gilikayan na nila ang dalaga.

Taudtaod ang maong sitwasyon nga nagmingaw na ang balay nilang Melba, kay wala na may mamisita kaniya. Dili sama kaniadto nga mag-abot ang mga lalake nga mamisita kang Melba.

Unya miabot ang panahon nga may usa ka lalake nga nangursunada sa pagpamisita sa balay nilang Melba. Si Jaymart. Usa siya ka ulitawo nga nagpuyo sa kanait nga barangay.

Nakagusto siya kang Melba.

Lahi ang diskarte nga gigamit ni Jaymart sa pagpangulitawo kang Melba. Lahi sa gibuhat sa uban. Nakigsuod si Jaymart sa mga ginikanan ni Melba.

Kanang moanha siya sa balay nilang Melba, magdala siyag bino alang sa amahan sa dalaga. Makig-inom pa si Jaymart sa amahan sa dalaga, ilabi na og may okasyon. Dad-an usab kanunay ni Jaymart og mga prutas ang inahan ni Melba, sama sa mansanas nga maoy kinaham niini.

Tungod kay nasuod na man ni Jaymart ang mga ginikanan ni Melba, dako kaayo siyag higayon sa pagpadayag sa gibati niya ngadto sa dalaga. Ug nagkasinabtay ang duha nila ka kasingkasing. Uyab na sila.

USA ka gabii niana samtang nahikatulog na ang mga ginikanan ni Melba, may gitug-an si Jaymart kang Melba.

“Hibawo ka, my love, misalir baya ang akong estratehiya,” ni Jaymart.

“Estratehiya sa unsa, Jaymart?” sakgaw ni Melba.

“Ako ang nagpakatap sa estorya nga ungo si Tatay ug si Nanay nimo,” hunghong ni Jaymart sa dunggan ni Melba.

“Ha?” mao day pulong milugwa sa baba ni Melba. Unya gisigihag kusi ang kilid ni Jaymart nga nagkapulikig panagang samtang nagkatawa.

“Ayay…” ni Jaymart nga gisakitan kunohay.

“Maldito ka ha. Mao diayng wa na mamalik pagbisita sila Joseph, Allan, Jerry ug Junjun dinhi sa amo,” ni Melba nga nagpahiyom.

“Gibuhat ko kadto aron dili na sila mopadayon pagpangulitawo nimo, Mel,” tug-an ni Jaymart. “Ug wala na koy karibal sa imong gugma.”

Unya gigakos ni Jaymart si Melba. Dayon nag-abot ang ilang mga ngabil aron dimdimon ang tam-is nga nektar sa ilang gugma. (KATAPUSAN)