Kon ikaw pahukmon: Masaker

GIHAKOP sa tumang kahadlok ang tibuok barangay human gimasaker ang tanang mga sakop sa usa ka pamilya. Napalgan nga patay sila si Jim, Ely, ug Linda, ingon man sila si Willy ug Marlon.

Ang mga biktima nakaangkon og mga samad pinusilan ug tinigbasan nga maoy hinungdan sa ilang kamatayon. Giingong nangatulog ang mga biktima sa ilang balay dihang ning-abot ang mga akusado ug girakrakan sila og diretso. Di pa igo nga duna silay mga samad pinusilan, gipangtigbas pa gyud ang mga biktima.

Ang mga akusado mao sila si Osting, Onyot, Estong, Sammy, Kim ug Isok.

Sa mga akusado, si Estong lang ang wa mopabuto sa iyang armas.

Si Osting namahayag nga dihang nahitabo ang masaker, didto siya sa pikas lalawigan.

Nagpuyo siya isip mag-uuma ug nanginabuhi pinaagi sa pagpanguha og dugos sa kabukiran.

Wa siya makaila sa pamilya nila ni Jim. Nahibawo siyang nadakpan si Estong nga usa ka Cafgu.

Utro usab si Onyot, nanghimakak siya nga apil sa masaker. Human mahitabo ang krimen niadtong 1984, nasikop siya niadtong 1993. Matod niya nga ang nahabiling mga sakop sa pamilya sa mga biktima nitanyag kaniya nga hatagan siya og kuwarta basta itudlo lang ang laing duha ka mga akusado nga maoy nipatay sa mga biktima.

Apan matod ni Onyot nga iyang gibalibaran ang tanyag kay wa gyud siya makakita kinsa ang nihimo sa krimen. Iyang gipasabot nga kuhaon unta siyang saksi, di isip akusado.

Si Gorio, kinsa sa usa ka barangay kapitan, sa iyang bahin, niingon nga niadtong lang 1993 siya nakahibawo nga mga akusado sa masaker sila si Onyot ug Osting. Samtang nakaila siya kang Estong kay iya kining linudhan sa kasal.

Samtang si Adan, kinsa usa ka pastor, niingon nga nakaila siya kang Onyot nga ordinaryo lang nga mag-uuma. Kini nanginabuhi nga tigkuha og dugos sa kabukiran. Di sab kini miyembro sa bisan unsang armadong grupo.

Base sa mga pamahayag sa mga akusado ug saksi, tinuod gyud kahang apil sila si Osting,Onyot ug Sam sa pagmasaker sa usa ka pamilya? Usa lang ang saksi sa prosekusyon nga mao si Estong, kinsa nasikop og una kanilang tanan niadtong 1993. Wa kaha butang butangi ang mga akusado aron maluwas ang iyang kaugalingon?

Hukom sa kasong robbery with homicide ug carnapping

Sa kasong robbery with homicide, ang akusado napalgang guilty ug gisilutan og reclusion perpetua. Samtang sa carnapping, guilty gihapon siya ug gisilutan og indeterminate penalty of imprisonment sa 17 ka tuig ug upat ka buwan isip minimum ug 30 ka mga tuig isip maximum.