Sugilanon: Nagkatakdong mga pagbati

Eliza Arisgado
Oslob, Cebu

MIREKLAMO na sa kagutom ang tiyan ni Clarrence dihang nagpadulong na siya sa ilang school canteen. Kay lagi wa pa siya kapaniudto niadtong tungora kay aduna siyay gihuman nga mga assignment. Mi-order siya og balig duha ka burger with ham and cheese.

Mipalit pod siya og imnunon nga sopdrink dayon lingkod sa usa ka dakong lamesa nga way nag-okupar.

Dakuon nga pagka babaye si Clarrence, apan hitsuraan. Samtang nagkaon sa iyang gipalit nga hamburger, kalit siyang natuk-an dihang nasugat sa iyang mga mata ang iyang crush didto sa lamesa nga atbang sa iyang lamesa. Nagpahiyom kini kaniya.

“Hala, kauwaw ani, uy! Makaingon jud ni si Troy nga dako gyud ko og kaon,” sulti niya sa iyang kaugalingon human makainom sa sopdrink kay natuk-an.

Tungod sa tumang kauwaw wa niya kan-a ang usa ka burger . Milakaw dayon siya kay
nawala na man ang iyang kagutom. Mipaingon siya sa library aron humanon ang iyang gimbuhaton.

“Kauwaw jud ato, uy! Gigutom na man god ko kaayo ganina,” ni Clarrence didto sa iyang hunahuna samtang nagpanglingo-lingo.

Samtang nagpadayon pagtiwas sa iyang mga assignment, wa mahimatikdi ni Clarrence nga may miduol sa gilingkuran niyang lamesa sulod sa library.

“Excuse me, naa bay naglingkod dinhi?” ni Troy nga nagpahiyom.

“W-Wala man,” mubong tubog ni Clarrence tungod sa kahi kurat.

“Puwede ba ako ang molingkod dinhi?”

“Sige. Have a seat.”

Naproblema na hinuon siya kay dili unta siya ganahan magpakita kang Troy tungod sa nahitabo kaganina didto sa canteen, apan nagpaduol na hinuon kini kaniya.

“Ay, Clarrence, cute kaayo ka ganina nga nikaon sa imong burger,” dayeg ni Troy nga mitan-aw sa nawong sa dalaga. “Lingaw kong nagtan-aw nimo.”

Wa damha ni Clarrence nga nakaila diay ang iyang crush kaniya. Iya karong nabatyagan nga namuwa ang iyang nawong ug daw nanghugot ang iyang mga aping.

“Kaila ka nako, Troy?” sukna ni Clarrence nga mibundak sa ngalan sa ulitawo.

“Oo, uy. Dugay na,” ni Troy nga mitingsi.

SUKAD niadtong higayuna nagkasuod sila si Clarrence ug Troy. Sila na ang magkuyog-kuyog, ilabi na kon parehong bakante ang ilang mga oras. Wa dangtig dugay nahibaw-an nila nga dugay na diay silang may pagbati sa usag-usa. Paglabay sa pipila ka mga bulan nahisangko gyud ang ilang relasyon ug panaghigalaay ngadto sa panaghigugmaay, kay nagkatakdo man ang ilang mga pagbati. (KATAPUSAN)