Sugilanon: Kasingkasing sa gugma

Anreb Chan
Cebu City

SAGUNSON nga mitulo ang mga luha ni Richard dihang iyang nahibaw-an nga gidala sa ospital ang iyang pangasaw-unon nga si Jade tungod kay giataki na usab sa sakit sa iyang kasingkasing. Kritikal na ang sitwasyon ni Jade sa pag-abot niya sa ospital.

Nagkinahanglan na kini ug heart transplant sa daling panahon. Adunahan ang pamilya nilang Richard ug Jade. Wa sila maproblema sa kuwarta, apan wa pa silay nakuha nga donor og kasingkasing.

Tulo ka adlaw na ang nakalabay sukad na-admit si Jade sa ospital. Kon dili siya maoperahan pagdali, posibleng makabsan siya sa kinabuhi. Wa mapugngi ni Richard ang iyang kaugalingon nga di maguol. Atubangan sa altar sulod sa kapilya sa ospital nakig-estorya siya sa Ginuo.

“Diyos ko, pasayloa ako sa akong mga sala. Hatagi kami og mo-donar og kasingka­sing kang Jade. I love her very much, Lord!” naghilak si Richard samtang nagluhod.

Pipila pa ka minutos ang milabay human nag-ampo miadto si Richard sa kuwarto diin mahimutang si Jade. Iyang gi-estoryahan ug gisultian unsa niya kini kamahal. Human nakig-estorya sad siya sa iyang pamilya ug sa pamilya ni Jade.

“Tita, kamo na bahala kang Jade, ha? Ayaw gyud intawon siya pasagdi,” kahilakon nga misulti si Richard sa inahan ni Jade.

“Naunsa ka man, Chard? Natural dili namo pasagdan si Jade, uy!” mahibulong namulong ang inahan ni Jade.

“Ma, anak gihapon imong pagtagad kang Jade, ha? Bisag unsa pa ang mahitabo, ha?” matod ni Richard ngadto na sab sa iyang inahan.

“Unsa god kanang gipanulti mo, Chard? Kaslon na baya kamo sunod buwan. Dili kita pasagdan sa Ginuo. Manggiluy-on kaayo Siya,” matod sa inahan ni Richard.

“Moadto sa ko sa Katedral aron mag-ampo, Ma, Tita,” ni Richard.

Dali siyang nanaog sa ospital ug misakay sa iyang kotse. Didto mihilak ug mibakho siya sa tumang kaguol. Unya nangayo og pasaylo sa kahitas-an. Naghimo siya ug suwat alang sa iyang mga ginikanan ug alang kang Jade.

“Pasayloa ko, Ginuo sa akong buhaton. Ingon ani ang pagmahal ko kang Jade. Gusto ko pa siyang mabuhi.”

Gipaandar ni Richard ang kotse ug kusog nga gipadagan ang sakyanan. Unya iya kining gibangga sa usa ka poste nga duol sa simbahan. Tungod sa impak sa iyang pagkabangga nakabsan siya sa iyang kinabuhi. Nabasa sa iyang pamilya ang iyang suwat nga iyang gituyo ang pagbangga sa iyang kotse sa poste, aron idonar ang iyang kasingkasing ngadto kang Jade. Iyang gihimo ang tanan alang sa iyang hinigugma. Gihatag niya ang tanan, lakip na ang iyang kinabuhi ug kasingkasing, alang sa iyang gugma kang Jade. (KATAPUSAN)