Sugilanon: Tungod sa kasilag

Jenny Ford
Carcar City

“DAMIANNNNN, ampo na lang sa tinugyanan sa balaod aron walay dautang mahitabo kanimo!

Ayaw kahadlok, among ipaniguro ang imong seguridad!” mao kini ang gibalik-balik pagsinggit sa kadagkuan sa kapulisan nga mipa-surender kang Damian.

“Dili ko moampo kaninyo! Wala koy sala! Nganong inyo man kong dakpon? Sala ba diay ang mahigugma?” tubag ni Damian ngadto sa mga pulis.

Ang tanang nahitabo nagsugod dihang nagtrabaho si Damian isip family driver sa panimalay ni Madame Lucia. Nahimo niyang hinigugma ang bugtong anak niini nga si Amalia. Tinago-tago ang ilang relasyon tungod kay dakong supak ang inahan sa dalaga kay dili managsama ang ilang estado o kahimtang sa kinabuhi. Dili buot ni Madame Lucia nga mahigugma ang iyang anak sa kabos nga lalake. Apan gipadayon gihapon nilang Damian
ug Amalia ang ilang relasyon.

Bisan sa kakabos ni Damian, hugot ang iyang hukom nga makatapos sa iyang pagtuon.

Mitrabaho siya sa adlaw ug mitungha sa gabii. Naa na siya karon sa ikaupat nga tuig sa kursong Criminology. Si Damian maoy drayber sa kotse ni Amalia. Siya ang mohatod-kuha sa dalaga sa tulonghaan niini. Tungod sa kanunay nilang panag-uban nagkasuod ug nagkailhanay sila sa tagsa-tagsa nila ka batasan. Buotan ug masinabuton nga anak si Amalia, sukwahi sa kinaiya sa iyang mga ginikanan nga mata-pobre. Bisan sa ilang kaadunahan, si Amalia dili mamili kon kinsa ang iyang higalaon. Sa iyang bahin, maalagaron sab si Damian kang Amalia. Siya ang tigdala sa mga galamiton niini sa eskuylahan, lakip na ang paghimo sa mga proyekto sa dalaga. Tunod niini nahulog ang kasingkasing sa dalaga ngadto sa ulitawo.

“Dili man lisod higugmaon si Damian. Naa kaniya ang mga hiyas nga akong gipangita sa usa ka lalake. Buotan, ambungan ug sakto sa iyang pamarog,” dayeg ni Amalia sa hilom.

Nasayod sab siya nga daghang mga babaye sa ilang subdibisyon ang buot makigsuod kang Damian ug dili niya kapugngan ang pagselos.

USA ka buntag niana samtang naghatod na si Damian kang Amalia sa unibersidad nga gitunghaan niin, wa nila mabantayi nga gisundan sila sa hilom ni Madame Lucia. Dihang mosulod na unta ang dalaga sa gate sa eskuylahan, maoy nakita ni Madam Lucia nga gihagkan sa ulitawo ang dalaga. Wa siya makatuo sa iyang nakita. Misantop dayon sa iyang hunahuna ang tabi-tabi nga iyang nadunggan gikan sa iyang mga suluguon bahin sa relasyon ni Damian ug Amalia.

Nagplano dayon og mga paagi si Madame Lucia: mga panghitabo nga makapabuwag sa duruha.

Gipasakaan niya si Damian og kasong pagpangawat ug pagpanamastamas sa pagka babaye sa iyang anak. Bisan sa pagdumili ni Amalia sa gibuhat sa iyang inahan, wa siyay nahimo kay di man siya makagawas nga mag-inusara. Buot niyang isaysay sa hukmanan nga ang tanan mugna lang sa iyang inahan tungod kay nasilag kini kang Damian nga maoy iyang gihigugma bisan kini drayber lamang.

Samtang naglingkod si Amalia sa sala nadani ang iyang atensyon sa breaking news sa telebisyon mahitungod sa pagpa-surender sa mga pulis kang Damian. Wa siya maglangay.

Dali siyang mikanaog sa ilang balay ug mideretso sa nahimutangan ni Damian. Giilog ni Amalia ang megaphone gikan sa pangulo sa kapulisan ug dayon gisaysay ang tinuod nga nahitabo.

Dako ang kahikurat sa mga pulis ug sa katawhan nga nagtapok didto niadtong tungora mahitungod sa gisaysay ni Amalia.

“Damian, si Amalia ni! Gawas na ug ampo na. Adto sa korte isalbar imong kaugalingon.

Isaad ko nga magpaluyo ko nimo aron maangkon mo ang sakto ug tinuod nga hustisya.

Gihigugma ko ikaw! Busa gawas na!” milanog ang tingog ni Amalia samtang nangagay sa iyang kaapingan ang mga luha. (KATAPUSAN)