Tambagi ko Noy Kulas: 3 gyud ang BF

DEAR Noy Kulas,

Tagoa lang ko sa ngan nga Ms. Pink, taga Cebu. Naa ko magtrabaho sa usa ka call center. Ang akong problema mao ang akong lovelife nga colorful kaayo.

Maingon tang colorful kay tulo man gud ang akong boyfriends. Si Manly1, Manly2 ug Manly3 akoang pulos full-time boyfriends. Nilang tulo, si Manly3 ang nakahibawo nga tulo sila ka buok nga akong gilumpong. Actually mahug ning amoa nga friends with benefits. You know na tingali sa meaning ana nga words no kay mao nay uso ron.

Kini silang tulo pulos na dunay nahitabo namo. Si Manly1 hinuon tagsa kay overseas siya gatrabaho kay seaman siya. Kini si Manly2 nagtrabaho sa usa ka call center sama nako pero dunay mga time nga di magkaabot ang among schedule mao di mi magkita. Diha mosulod si Manly3 nga ako rang kauban sa company. Friends lang mi but kon dunay higayon, mag-uban mi sa private room kay adto mi mamahuway gikan sa work. Kami ni Manly2 magkauban lang kon pareho mig schedule.

Naproblema ko kay ni-chat nako si Manly1 nga unyag uli niya among i-process ang among civil wedding. Nilang tulo, siya gyud ang akong love kay lima na mi ka tuig nga uyab.

Ang duha ako lang gigamit pawala sa kalaay ug stress sa work. Unsa man kaha ang akong buhaton, Noy Kulas? Tambagi ko kay naglibog na gyud ko.

MS. PINK

Ms. Pink,

Simple ra man kaayo nang imong problema kon imo ba­yang tan-awon. Buwagan nimo ang duha ug moundang ka sa imong call center work. Ang nagtukmod nimo sa pagbuhat niana mao ra sab ang imong klase sa trabaho nga stressful kaayo. Kon di ka mopahawa sa imong work, magpadayon ang inyong panagkita sa imong duha ka laing mga boyfriend. Di man na ikahibung kay naa man sab koy mga higala sa call center nga mo-confirm nga dunay pipila nila nga ingon ana ang lovelife.

Usa pa, lisod kaayo nga imo nang buhaton sa sulod sa kaminyuon. Nakasala ka na gani karon, unsa na kaha kon mahigot ka na sa talikala sa kaminyuon. Niingon ka man nga love nimo si Manly1, imo untang gihimo ang kasingkasing nga mopitik lang gyud alang kaniya. Wa ka moduwa og laing team. Kana man gud nga batasan kuyaw kaayo sa sexually transmitted diseases. Nakaseguro kaha ka nga ikaw ra ang sexual partner nianang duha nimo ka boyfriend?

Mas maayo man gud nga usa ra ang partner kay mao lagi na, gawas nga nakasala ka sa inyong relasyon ug sa Ginuo, nagbutang ka sab sa kakuyaw sa imong kaugalingon sa mga sakit. But, epektibo lang kini kon ikaw mobiya sa imong trabaho karon.

NOY KULAS