Serna: Amazing Show makalingaw

NIPAKANAUG sa hukom ang Court of Appeals nga niuyon sa hukom sa Professional Regulations Commission sa pagbawi sa lisensya ni Hayden Kho isip doktor. Kini kalabot sa sex video scandal nila ni Katrina Halili niadto.

Maayo na lang kay pabor ni Katrina ang hukom kay delikado ra ba ang iyang kahimtang kay mabdos sa anak nila ni Kris Lawrence. Nakaginhawa gyud tingali kinig lawom.

***

Naapil ko sa pipila ka taga media nga giimbitar ngadto sa awarding sa Top 20 Taxpayers sa Lapu-lapu City nga didto gihimo sa Movenpick Resort & Spa sa miaging semana.

Si Mayor Paz Radaza gyud ang nangunay paghatag sa mga award inabagan sa ubang mga opisyales. Mga pahalipay sa mga awardees sama sa Shangri-La’s Mactan Resort and Spa; Taiyo Yuden Philippines Inc.; General Milling Corp.; Phil. BXT Corp.; Filinvest Land Inc.; Waterfront Airport Hotel and Casino Inc.; Gaisano Grand Mall of Mactan; Far East
Noble House Inc.; Muramoto Audio-Visual Phils. Corp;

Lear Automotive Services (Netherlands) Corp.; Plantation Bay Holdings Inc.; Movenpick Resort and Spa Cebu; Yamashi Cebu Filter Manufacturing Corp.; Fairchild Semiconductor; Bigfoot Properties Inc.; Prohomes Development Inc.; Olympus Optical Technology Phils. Inc.; Lexmark International (Phils.) Inc.; Ajinomoto Phils. Corp.; Philippine Long Distance Telephone Co.; ug East Asia Utilities Corp.

Si Verni Varga ang ilang maglilingaw. Tungod kay Broadway ang motif, mikanta si Verni og Don’t Cry For Me Argentina ug New York New York. Apil usab sa gikanta ang Take 5 nga mora siyag langgam paminawon ug Usahay.

Seksi pa gihapon si Verni bisan may mga anak na kining nag-edad og 16, 15 ug 12. Hilig sa cinematography ang kamaguwangan ug gitara ang kalingawan sa kamanghuran. Way nahilig sa pagkanta o pag-arte.

Way kan-onay ang show alang ni Verni sukad pa sa nag-edad siyag 20. Utanon, isda ug prutas ray iyang kan-on. Di sab siya moinom og bugnaw aron pagpanalipod sa iyang tingog. Anà.

Mga 10 na tingali kuno ka tuig nga wa siya kabalik sa Bantayan pero bisan pa man og nagpuyo siya sa Manila sukad sa usa pa ka tuig iyang edad, larino pa gihapon kini mo-Binisaya. Maayo.

***

Walo na man diay ka tuig ang Amazing Show sa isla sa Mactan pero niadtong Miyerkules sa gabii pa lang gyud mi nakahigayon pagtan-aw sa maong pasundayag. Didto kini sila sa Hadsan sa una ug gamay lang nga lugar ang ilang giabangan pero karon naa na sila sa Bagumbayan II sa Maribago, Lapu-lapu City ug may kaugalingon na kining bantawan nga nindot kaayo.

Kon wa pa lang mi sultii nga di tinuod nga mga babaye ang mipasundayag, seguradong mailad gyud mi kay pulos man gyud gwapa ang mipatunga sa tablado. Duna sab hinooy mga lalaki nga, kon si Charlotte Cinco pay pasulti-on, ‘may kaambong nga mahagpat.’
Lainlain ang ilang mga numero. May Pinoy (Singkil), Koreano (Arirang), Latin ug Hapon (Nada Sousou). Duna say pina-Ricky Martin (She Bangs), Marilyn Monroe ug Thalia.

May kinuha usab sa mga sikat nga Broadway musicals ug ubang pasundayag sama sa Dreamgirls, Chorus Line, Las Vegas, One Night Only, Nobody, Limbo Rock ug Fame.

Makalingaw ang tibuok pasundayag pero mga turista pa ang ilang gipatan-aw (apil na mi, o-ha!). Ana lang!