Sugilanon: Ang iyang biktima

Israel G. Ybañez
Mayupay, Quiot, Cebu City

KAADLAWONG dako apan grabing sapot ang midangat kang Gardo. Maoy iyang nakita nga abili na ang pultahan sa ilang panimalay sa iyang pag-abot gikan sa ospital. Sa pagsulod niya sa lawak nilang magtiayon abli na sab ang aparador ug nahanaw ang salaping giandam niya sa pagpanganak ni Sima, iyang asawa. Lakip ang duha ka laptop nawala.

“Unsa kahay dangatan sa akong asawa kon di ko makahatag sa dugang depositong kuwarta para caesarian niya?” ni Gardo sa iyang kaugalingon nga puno sa kalagot ang galamhan.

Ang kuwarta ug ang duha ka laptop gipuhonanan niyag singot ug kahadlok, apan nag-inisog siya aron maangkon kini alang sa iyang asawa.

Ang linungkabay sa ilang dapit maoy suliran sa ilang barangay kapitan. Ug problema sab ni Gardo ang nahitabo tungod kay atua sa ospital ang iyang asawa.

Untop alas singko sa hapon miabot si Gardo sa ospital kagahapong adlawa. Gi-teksan siya ni Nang Bebing, iyang inahan, ug gipahibalo nga naadmit si Sima, iyang asawa.

“Atua na sa delivery room si Sima, Gardo,” matod ni Nang Bebing nga mitagbo kaniya sa iyang paghiabot.

“Nahibulong kong mibasa sa teks nimo, Ma. Akong natamdan nga sunod pa siyang bulan manganak,” ni Gardo.

Kulba-hinam ang gibati ni Gardo niadtong higayuna. Way hunong ilang pangaliya sa kahitas-an nga panalipdan sa dautang hitabo iyang asawa.

“Sir, kinahanglan i-caesarian ang asawa mo. Busa ma­ngayo mig dugang deposito nga P20 mil aron maasikaso dayon si Misis alang sa iyang kaluwasan ug sa una mong liwat,” pahibalo sa kawani sa ospital nga miduol kanila.

Kay wala siyay laing kapaingnan nag-inisog siya pagsaka sa usa ka balay ug nakuha niya ang igo-igong salapi ug duha ka laptop.

“Mao diay hinungdan nga mag-alas dose na sa tungang gabii, wala pa makagula sa delivery room si Sima,” bagulbol ni Gardo.

WAY nahimo si Gardo gawas sa pagsigig hinuktok sa ilang sala nga naabtan ni Nang Bebing.

“Naluya kog pinaabot nimo didto sa ospital, Gardo. Nagtungok ra man diay ka dinhi!” gikasab-an ni Nang Bebing ang anak.

“Gilungkab lagi ang balay, Ma, ug wala na koy ikabayad sa ospital kay nadala sa kawatan ang salapi nga akong inandam,” asoy ni Gardo.

“Suwerte gani kay nagkakita mi sa akong amo nga dunay giduaw sa ospital. Gibayran una ni Mam Maris Gimena ang deposito. Luwas na imong asawa. Gusto unta siyang motabang sa bayranan sa ospital pero nahurot iyang salapi sa milungkab sa iyang balay, lakip na
ang duha ka laptop niya,” saysay Nang Bebing.

Daw bomba atomika ang nadungog niya gikan sa iyang inahan. Ang babayeng mitabang nila, iyang biktima, maoy tag-iya sa balay nga iyang gilungkab. Ug nahinumdom siya sa gitudlo kanila sa ilang maestra, “Ayaw buhata sa uban ang dili mo gustong buhaton nila diha nimo!” (KATAPUSAN)