Kon ikaw pahukmon: Kay Cafgu

MGA alas 8:45 sa gabii niadtong Agusto 27, 2001, sila si Boy, usa ka sakop sa Cafgu, ug ang iyang pamilya nangatulog dihang kalit lang dunay ningpatid sa pultahan sa ilang balay. Nidiretso pag-adto sa ilang gikatulgan ni Aileen ang mga suspek nga naglakip kang Nestor.

Gilibutan sa laing mga tawo ang balay samtang nanulod ang laing upat ka mga tawo, usa kanila ang akusado. Gigapos ang mga kamot ni Boy ginamit ang pisi. Gidugsak og riple ang dughan sa biktima dayon gibitad padulong sa gawas sa balay samtang gikuptan ang buhok.

Samtang nagluhod si Boy sa tugkaran sa iyang balay, gitiunan ang iyang liog sa pistola. Nagpakiluoy siya nga di hilabtan kay duna siyay pamilya. Apan usa sa mga suspek niingon nga kay nikutlo man siya og usa ka kinabuhi, bayran usab kini niya og kinabuhi.

Nakadungog dayon og mga buto sa pusil ang iyang pamilya dayon natumba sa yuta ang biktima nga patay na. Duha ka mga tawo ang ningpasalba og makaduha dayon nisinggit nga mabuhi ang NPA.

Ang pamilya sa biktima ning-ila kang Nestor nga usa sa mga ningpatay kang Boy kay wa kini magtabon sa iyang nawong dihang gihimo ang krimen.

Si Mario, kanhi usab rebelde, niingon nga si Boy gipatay tungod sa iyang paggiya sa military sa pagsulong sa kampo sa mga rebelde. Namatay ang duha ka mga rebelde atol sa raid.

Nitug-an si Mario nga ang pagpatay sa biktima giplano nianang Agusto 20, 2001 sa usa ka kampo sa mga rebeldeng New People’s Army. Matod niya nga nakatambong siya sa meeting. Nianang Agusto 24, ningbiya ang iyang mga kauban sa ilang kampo aron adtuon ang pinuy-anan sa biktima.

Nahibalik ang iyang mga kauban niana nang Agusto 28. Iyang nadunggan ang iyang mga kauban nalipay kay nakapatay sila og kaaway.

Apan si Nestor niingon nga niadtong adlaw nga gipatay si Boy, didto siya sa balay sa iyang inahan. Wa gyud siya makaila sa iyang mga kaubang akusado ingon man sa pamilya sa biktima.

Wa makakita ang pamilya ni Boy kinsa gyud ang nipusil kaniya kay diha ra man sila sa sulod sa balay samtang ang biktima giguyod padulong sa gawas. Giunsa man sab nila pag-ila sa akusado nga di man sila kaila? Wa kaha sila masayop sa pagtumbok kang Nestor nga maoy usa sa mga mamumuno? Sad-an ba ang akusado ning kasong gipasaka batok kaniya?

O makalusot siya niini, kana kon tinuod man nga usa siya sa mga nagpatay, kay usa man siya ka rebelde?

Hukom sa mga kasong murder, frustrated murder

Napalgang sad-an sa duha ka mga kasong murder ang akusado. Gisilutan siya og reclusion perpetua sa matag kaso.

Sad-an usab siya sa duha ka mga kasong attempted murder. Kini nagpasabot nga gisilutan siya og duha ka prision correccional nga maximum ngadto sa prision mayor medium. Kini nagpasabot nga mabilanggo siya og tagduha ka unom ka tuig ngadto sa 10 ka mga tuig.

Guilty usab siya sa kasong frustrated murder diin siya gisilutan og dose ka mga tuig ngadto sa 17 ka mga tuig ug upat ka mga buwan.