Martin: The Healing showing, July 25

AC Martin
Tagming

NAG-PROMO tour na last week ang Star Cinema sa ilang latest offering nga “The Healing” sa Davao pero si Kim Chiu ra kunoy nitunga.

Matod ni Ms. Josie Pereyra nga maglisud na si Gov. Vilma Santos kon mokuyog pa siya sa promo tour.

Akong gipangutana kon moanhi ba sila sa Cebu, dili na kuno kay wa nay sila’y panahon.

Puwes, wa sad mi panahon ninyo. Hehehe… joke! Bitaw, kusog ning salidaha kay Kim Chiu baya, plus comeback movie pa gyud ni Vilma.

Ang horror movie nga The Healing showing na karong July 25 in over 100 theatres nationwide.

BUHONG

Di na magmahay si Dolphy kay grabe kaayo siya ka-blessed, sa mga higala, pamilya, anak, career, sa chicks ug sa edad nga 83… maorag naa na gyud niya tanang kapritso sa kinabuhi.

Six years ago dihang na-ospital si Dolphy, si Willie Revillame ang nibayad sa iyang hospital bills. Karon na pud, si Manny Pangi­linan.

Buhong kaayo bisan sa iyang kamatayon kay di lang ang TV5, kundi hasta ang ABS-CBN ug GMA-7 nihatag sad og igong kantidad, wa pa nay labot sa mga artista ug mga adunahang higala ni Dolphy nga nagtampo-tampo ug niangkon sa uban pa niyang kinahanglanon.

Tua sad sa Manila ang tag-iya sa Chilen Chicharon, maorag usa sad siya sa nihatod ni Dolphy niadtong Dominggo? Mao nang ang atong resulta sa winners sa balik-eskwela promo sa Chilen, karon na lang tang Huwebes.

Samtang ang hottest loveteam sa GMA nga silang Louise delos Reyes ug Alden Richards ang atong gikatakdang himbisan ugma.

In fairness, daghang entertainment writers ang na-in love atol sa ilang One True Love promo tour sa Cebu niadtong Sabado tungod sa ka brayt nilang manubag. Ugma na na ha, sa Super Ka!