Sugilanon: Nahilaw

Frank B. Guivencan
Poblacion, Barili, Cebu

SI FLORING ug si Remie managtiayon nga edad-edaran na. Sanglit nangaminyo na man ang tulo nila ka mga anak, sila na lang duha ang nagtikaw-tikaw sa ilang panimalay. Pulos sila mahadlukon sa Diyos, kay sa ilang kaminyuon wa gyud ni sila mogamit og artificial family planning control kay nahadlok sila nga makasala sa Diyos. Natural family planning ang ilang gihimo.

Mao sab kini ilang gitambag ngadto sa na­ngaminyo nilang mga anak. “Likayi ninyo ang pagpakasala. Ayaw mo padala sa uban nga tiggamit og tabletas, indyeksyon aron di modaghan ang ilang anak. Ngano man lagi mi, tulo ra man mo ka buok? Natural family planning ra among gihimo tungod kay kamao man mi mopugong sa among kaugalingon. Dili ta mga mananap. Mga utokan kitang mga tawo kay sa mga hayop.busa atong pahimuslan ang atong kaalam pinasubay sa kabubut-on sa Diyos.

Usa ka adlaw niana, giagni ni Floring si Remie nga mangumbira sa ilang silingan nga adunay anak nga gikasal.

“Pag-ilis na diha, Rem, kay mangadto ta sa kumbira,” agda ni Floring.

“Naunsa ka diha? Pag-syur diay, uy! Kitang duha gyud ang mangadto? Mauwaw ta ana, uy,” tubag ni Remie.

“Ngano god nga maulaw ta, nga imbitado man tang duha?” ni Floring.

“Uy, kon gusto kang moadto, ikaw lang. Ayaw ko i-angin sa imong pagka hingumbira!” ni Remie nga misulinga sa iyang bana.

Wala na motingog si Floring. Nag-ilis siya ug milakaw paingon sa balay sa ilang sili­ngan nga gikasal. Mikaon siya ug miinom uban sa mga bisita.

Dihang namatikdan niya nga nanginit na ang iyang mga aping nakahukom siya nga mopauli. Apan nasangit ang iyang panan-aw sa bag-ong kasal.

Nakita niya nga paraygon kaayo ang babaye nga gisigian og gakos sa lalake. Napukaw sa iyang galamhan ang nangagi sa batan-on pa sila si Remie. Sugo sa kainit sa iyang lawas tungod sa tuba nga iyang nainom, midali siya pagpauli.

Sa laing bahin si Remie naglawog sa ilang baka. Nahibulong sa iyang bana nga sagol dagan ang paglakaw.

“Naunsa man ka, Floring, nga sagol dagan man imong linaktan? Nakakita kag away?” may kabalaka nga nangutana si Remie.

“Wa man. Pauli na ta kay magpapisil ko sa akong tampihak,” matod ni Floring.

“Tingali og nasubrahan ang imong pag-inom,” ni Remie.

Dihang nahiabot na sila sa ilang balay gihilot dayon ni Remie ang ulo ni Floring human kini mohigda sa ilang katre. Apan nakurat siya kay mikalit paggakos kaniya ang iyang bana.

“Unsa god ni? Papisil man kaha ka?” gibati og kalagot si Remie.

“Unya na ang pisil. Galain ang akong lawas,” ni Floring nga naghangos.

Namalikas si Remie. Wa siyay nahimo tungod kay lupig siya sa kusog sa iyang bana.

Gipasagdan na lang niya kini.

Wala dangtig dugay, mitindog si Floring ug mitalikod dayon. Naglagot si Remie nga nahabiling naghigda sa katre.

“Asa na man ka? Naniguro lang og iya!. Maayo pa ang pinaakan sa lamok kay mokatol pa!” matod ni Remie nga nahilaw. (KATAPUSAN)