Tambagi ko Noy Kulas: Wa damha
-A A +AMonday, July 16, 2012
DEAR Noy kulas,
SI Jhewelrain ko, taga Argao, bisexual, 19. Naa ko karon sa Lapu-Lapu nag-work. Akong problema kabahin sa akong sa akong lovelife. Itago lang siya sa ngalan nga Jay. Si Jay kauban nako sa work, gwapo kaayo ug nindot og lawas.
Kanang makakita ko niya nga maghukas, mabuang ko og tinan-aw sa iyang lawas kay pwerting nindota kay sakto ra ka kaayo ang lawas niya.
Makakita ko niya kon magduwa og basketball. Pila ka adlaw ang nilabay, iya kong gidala og inom. Actually di gyud ko moinom apan ako ra gyud kong gipugos akong kaugalingon sa pag-inom. Pipila ka tagay ang niagi nako, nahubog na ko ug siya pud. Apan makahibaw pa ko unsa akong gibuhat hangtod naabtan mi og gabii.
Iya kong gihatod sa boarding house nako ug didto mi nangatug ug wa ko kamatikod nga si Jay ni- kiss sa akong kamot ug niingon nga I love you.
Ambot ngano pud ko ato nga nisugot ra man pud ko nga makighilawas niya. Pagkaugma ana, ako siyang giinganan nga nakahinumdum pa ba siya sa among nabuhat nianang gabii. Niingon siya nga wa na siya makahinumdom. Ako nga nagpahiyom, niingon nga wa. Nikatawa ko, Noy. Unsa man akong buhaton aron maka move on sa tanan? Please tambagi ko, Noy, and more power.
JHEWELRAIN
Jhewelrain,
Maka move on ra ka. Kanang hitabo o frustrating nga hitabo sa kinabuhi sama ra na og samad, maalim lang nga di ka na makabantay. Kay ang gugma o bisan unsang pagbati, labina sa batan-on pa, molabay lang. Labina sa imong edad karon nga 19 pa lang.
Bitaw, dako kaayo og kahigayunan nga nakahinumdom nang mao nga lalake sa nahitabo ninyo. Iya lang nang lusot nga wa siya makahinumdom.
The fact nga iya kang gihatod, nagpasabot nga conscious siya sa nahitabo ninyo. Naanod lang hinuon siya sa gahom sa inyong giinom mao nga nahitabo kadto. Nagduda gani ko nga iyang plano nga siya ang mohatod nimo aron iyang ikapahungaw ang iyang gana nga nitumaw niadtong higayuna. Kana bang gitawag og spur of the moment, hitabo nga nitumaw lang og kalit nga wa paabuta.
You should expect nga sa imong sexual orientation, wa kaayoy relasyon nga mohangtod.
Tagsa ra kaayo ang makagamot gyud. Mao nay katinuoran nga angay mong tun-an sa pagpuyo.
NOY KULAS
Alang sa imong problema, e-mail lang sa: kulassuper@sunstar.com.ph o sa rojval69@yahoo.com. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city
Gipatik sa mantalaang SuperBalita Cebu Hulyo 17, 2012.
Kalingawan
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
